Mumbai Crime : शतपावली पडतेय भारी; मुंबईत मोबाईल चोऱ्यांच्या प्रमाणात वाढ; पोलिसांचे दुर्लक्ष?

Mumbai Crime: घाटकोपरमध्ये सध्या मोबाईलचोरीचे प्रमाण वाढले आहे. रात्रीच्या वेळी शतपावली करत मोबाईलवर बोलणेदेखील आता भारी पडू लागले आहे. बोलत असताना हातातील मोबाईल हिसकावून चोरी करण्याचे प्रमाणदेखील दिवसेंदिवस वाढले आहे.

तर बसमध्ये प्रवाशांच्या खिशातील मोबाईलवर डल्‍ला मारणारी टोळीच सक्रिय झाली आहे. नुकतीच घाटकोपर पोलिसांनी दाने मोबाईल चोरांना रंगेहाथ अटक केली आहे; मात्र पोलिसांनी आणखी चोख सुरक्षा व्‍यवस्‍था करणे गरजेचे असल्याचे बोलले जात आहे.

मागील दहा दिवसांत घाटकोपरमध्ये मोबाईल चोरीच्‍या अनेक घटना घडल्‍या आहेत. यामध्ये ५ ऑक्‍टोबर रोजी फिर्यादी हे मधुबन टोयोटा शोरूमसमोरून एल. बी. एस. मार्ग येथून मोबाईलवर बोलत पायी चालत जात असताना बजाज पल्‍सरवरून आलेल्‍या दोघांनी त्‍यांच्‍या हातातील ३० हजार रुपयांचा आयफोन चोरून पळ काढला.

याबाबत घाटकोपर पोलिस ठाण्यात दोन अज्ञात इसमांविरुद्ध गुन्हा नोंद करण्यात आलेला होता. त्यानंतर घाटकोपर पोलिसांनी मिळालेल्‍या गोपनीय माहितीच्या आधारे मोसीन लयीत अन्सारी (२० वर्षे) याला अटक केली. त्याच्‍याकडे चौकशी केली असता त्‍याने साथीदाराच्‍या सहाय्याने मोबाईल चोरी केल्‍याची कबुली दिली.

तर दुसऱ्या घटनेत ६ ऑक्टोबर रोजी घाटकोपर पश्चिम येथून बसमधून प्रवास करत असताना फिर्यादीच्‍या खिशातील नवीन मोबाईल लंपास करण्यात आला. याप्रकरणी अज्ञात इसमाविरुद्ध गुन्हा नोंद करण्यात आलेला होता.

त्यानंतर घाटकोपर पोलिसांनी गोपनीय माहितीच्या आधारे बसमध्ये मोबाईल चोरी करणारा मोहम्मद आरिफ अकबर हुसेन याला अटक करून त्याच्याकडून चोरलेले आणखी काही मोबाईल फोन हस्‍तगत केले. तसेच आरोपीकडून मोबाईल विकत घेणारा जमीर समीर सय्यद यालाही अटक करण्यात आली. त्याच्याकडून पोलिसांनी गुन्ह्यात चोरीस गेलेले मोबाईल तसेच इतर गुन्ह्यांतील विविध कंपन्यांचे तब्बल १ लाख ४१ हजार रुपये किमतीचे इतर मोबाईलदेखील हस्‍तगत केले.