Mumbai Rain Updates : पावसाने मुंबईची तुंबई केली! 'या' भागांमध्ये साचलं पाणी, प्रवाशांना फटका

मुंबई: मुंबईत गुरुवारी बरसलेल्या पावसामुळे शहराच्या ट्राफीक कोंडीची परिस्थिती होती. पश्चिम उपनगरासह चेंबूर,कुर्ला, विक्रोळी, हिंदमाता, चुनाभट्टी, सायन आणि किंग्ज सर्कल परिसरात ट्राफीक धीम्या गतीने सुरु होते. मुंबई आणि उपनगरातील अनेक रस्त्यांवर काही प्रमाणात पावसाचे पाणी साचले होते, त्यात जागोजागी निर्माण झालेल्या खड्ड्यांमुळे वाहतूकीला फटका बसला.

गुरुवारी दिलेल्या रेड अलर्टच्या इशाऱ्यामुळे मुंबई वाहतूक पोलिसांनी अनेक मार्गावरची वाहतूक बंद केली. पर्यायी मार्गावर वाहतूक वळवली.सोशल मीडियाच्या माध्यमातून वाहतूक कोंडी तसेच वाहतूकीसाठी बंद करण्यात मार्ग, पर्यायी मार्गाची माहिती देण्यात आली. महत्त्वाच्या कारणाशिवाय वाहने काढू नका असे आवाहन ट्राफीक पोलिसांकडून करण्यात आले होते. शाळा, कॉलेजचा सुट्टी दिल्यामुळे वाहनांची गर्दी इतर दिवसाच्या तूलनेत कमी होती.

पश्चिम द्रूतगती मार्गावर कोंडी

वांद्रे येथे पाणी साचल्याने पश्चिम द्रूदगती मार्गावर वाहनांची वाहतूक धीम्या गतीने सुरू होती. या मार्गावर जागोजागी वांद्रे ते सांताक्रुझपर्यंत ट्राफीक कोंडीची परिस्थिती होती. अंधेरी ते गोरेगाव पर्यंत वाहनांच्या रांगा लागल्या होत्या. अंधेरी पूर्व आणि पश्चिमेला जोडणारा अंधेरी सबवेमध्ये पाणी भरले होते. परिणामी कॅप्टन गोरे पूल आणि ठाकरे उड्डाणपुलाचा वापर करण्याच्या सूचना वाहतूक पोलिसांनी केल्या.

संथ गतीने वाहतूक

मुसळधार पावसामुळे काही ठिकाणी बेस्ट बसची वाहतूक वळवण्यात आली होती. दहिसर पूर्व परिसरात बेस्ट बसेसची वाहतूक वळवली होती. सायन रोड येथे पाणी भरल्याने सायन सर्कल ते सायन स्टेशन सिग्नल दरम्यान वाहतूक धिम्या गतीने सुरू होती. सायनमधील राणी लक्ष्मीबाई चौकाजवळ तर हिंदमाता परळधील दक्षिण मुंबईकडे जाणारा डॉ. आंबेडकर मार्गावर वाहतूक कोंडी झाली होती.

"मुंबईत पावसामुळे वाहतूक कोंडी झाली होती.परंतु वाहतूक पोलीसांकडून वाहतूक नियंत्रणात आणण्यात आली. तसेच मुंबईतील पावसामुळे वाहतुकीवर परिणाम झालेल्या मार्गाची त्यासोबत पर्यायी मार्गांची माहिती वाहतूक पोलिस वेळोवेळी सोशल मीडियावर दिली जात आहे."

- एम.रामकुमार, अतिरिक्त पोलिस आयुक्त ,मुंबई वाहतूक पोलीस