राणे बंधूंविरोधात FIR; नारायण राणे म्हणाले, "टीकेचे खंडन करणे हे.."

राणे बंधुंच्या अडचणी सध्या संपताना दिसत नाहीयेत. केंद्रीय मंत्री नारायण राणे आणि त्यांचे दोन सुपूत्र हे नेहमी आपल्या वादग्रस्त वक्तव्यांमुळे चर्चेत असतात. आता राष्ट्रवादी काँग्रेस पक्षाचे सर्वेसर्वा शरद पवार (Sharad Pawar) यांच्याविरोधात केलेल्या आक्षेपार्ह वक्तव्याच्याविरोधात नितेश राणे आणि माजी खासदार निलेश राणे या दोघांविरोधात मुंबईत गुन्हा दाखल करण्यात आला असून त्यावर नारायण राणे यांनी प्रतिक्रीया दिलीय.

केंद्रीय मंत्री नारायण राणे यांनी जनता किंवा विरोधकांची टिका खोडून काढणे हे सत्तारुढ पक्षाचे कर्तव्य असून विरोधकांच्या टिकेचे खंडन करण्याएवजी त्यांच्याविरोधात एफआयआर दाखल करणे म्हणजे सत्तेचा दुरुपयोग असल्याचे म्हटले आहे. त्यांनी दोन्ही मुलांवर गुन्हा दाखल झाल्यानंतर ट्विट करत व्हेरा समितीचा निकाल राज्य सरकारने मागवावा अशी मागणी केली आहे, त्यामध्ये कोणाचे दाऊदशी संबंध आहेत ते देखील समोर येईल असे देखील त्यांनी म्हटले आहे.

त्यांनी ट्विट करत "जनता किंवा विरोधक यांच्या टीकेचे खंडन करणे हे सत्तारूढ पक्षाचे कर्तव्य आहे. अशा प्रकारे त्यांच्या विरोधात FIR दाखल करणे, याला सत्तेचा दुरुपयोग म्हणतात. केंद्र सरकारच्या व्होरा समितीचा निकाल राज्य सरकारने मागवावा. त्यात कळेल कोणाचे दाऊदशी संबंध आहेत." असे म्हटले आहे.

तर गुन्हा दाखल झाल्यानंतर निलेश राणे यांनी पहिली प्रतिक्रीया व्यक्त करत, "कितीही माझ्यावर केसेस घातले तरी मी म्हणतच राहणार, मला संशय आहे आणि राहणारच की पवार साहेब दाऊदची व्यक्ती आहे." असे ट्विट केले आहे.

दरम्यान निलेश राणे आणि नितेश राणे यांनी जाणीपूर्वक हिंदू-मुस्लीम तेढ निर्माण करून दंगल घडेल असं वक्तव्य केलं. तसेच शरद पवार यांचे दाऊदसोबत संबंध असल्याचं वक्तव्य करून त्यांच्या जीवितास धोका निर्माण केला असे त्यांच्या विरोधात मरीन ड्राईव्ह पोलिस ठाण्यात दाखल केलेल्या तक्रारीत म्हटलं आहे.