Nashik Accident : बसमध्ये क्षमतेपेक्षा जास्त प्रवासी बसवले होते?

नाशिक औरंगाबाद रस्त्यावर आज पहाटे भीषण अपघात झाला. खासगी बस आणि कंटेनरची धडक झाल्यावर बसने पेट घेतला आणि यामध्ये होरपळून १२ मृत्यू झाले आहेत. आता या खासगी बसमध्ये क्षमतेपेक्षा जास्त प्रवासी बसवले असल्याचा प्रश्न उपस्थित केला जात आहे.

ही बस चिंतामणी ट्रॅव्हल्स या कंपनीची होती. या बसमध्ये क्षमतेपेक्षा जास्त प्रवासी बसवण्यात आले होते. त्याची चौकशी करून कारवाई होईल, असं जिल्ह्याचे पालकमंत्री संजय राठोड यांनी सांगितलं. राठोडांनी या प्रकरणी चिंतामणी ट्रॅव्हल्सच्या ऑफिसला भेट देत प्रवाशांबद्दलची माहिती घेतली आहे. शिवाय, सुरक्षा यंत्रणेबद्दलचीही माहिती घेतली आहे.

यंत्रणेचंही अपयश

पहाटे ४:३०- ५ च्या सुमारास अपघात झाल्यानंतर आसपासच्या नागरिकांनी घटनास्थळी धाव घेतली. काही नागरिकांनी तातडीने 100, 112 या क्रमांकांवर संपर्क साधले. अँब्युलन्सला फोन केला, अग्निशमन दलाशीही संपर्क साधला. परंतु सहा वाजेपर्यंत घटनास्थळी कोणीही पोहोचू शकले नाही. पोलीस दाखल झाल्यानंतर पोलिसांनी जखमींना शहर बसमधून जिल्हा रुग्णालयात दाखल केलं. मृतांनाही याच बसमधून जिल्हा रुग्णालयात आणण्यात आलं. बराच वेळाने 108 रुग्णवाहिका घटनास्थळी दाखल झाल्या. एकूणच या घटनेमध्ये आपत्कालीन व्यवस्था फोल ठरल्याचे दिसून आले.