''देवेंद्र फडणवीसांचे ड्रग्स पेडलरसोबत संबंध'', मलिकांचा खळबळजनक दावा

मुंबई : मंत्री नवाब मलिक (nawab malik) हे वारंवार एनसीबीचे अधिकारी समीर वानखेडे यांच्यावर आरोप करत आहेत. मात्र, आता मलिकांनी नवा दावा केला आहे. त्यांनी थेट माजी मुख्यमंत्री देवेंद्र फडणवीस (Former chief minister Devendra Fadnavis) आणि अमृता फडणवीसांवर (Amruta Fadnavis) आरोप केले आहेत. त्यांचे ड्रग्स पेडलरसोबत संबंध असल्याचा खळबळजनक दावा मलिकांनी केला आहे. त्यामुळे आता हे प्रकरण वेगळं वळण घेणार की काय? असा प्रश्न उपस्थित केला जात आहे.

''तुरुंगात बंद असलेला जयदीप राणा यांचं नातं महाराष्ट्राचे माजी मुख्यमंत्री देवेंद्र फडणवीसांसोबत आहे. फडणवीस महाराष्ट्रात मुख्यमंत्री असताना अमृता फडणवीसांनी रिव्हर साँग बनविले होते. यामध्ये सोनू निगम आणि अमृता यांनी गाण म्हटलं होतं. यामध्ये फडणवीस आणि सुधीर मुनगंटीवार यांनी अभिनय केला होता. डायरेक्टर सचिन गुप्ता होते. ते गाणं अभिजीत जोशी यांनी लिहिलेले होते. त्याचे फायनान्स हेड ड्रग्स पेडलर हा जयदीप राणा होता. जयदीप राणा आणि देवेंद्र फडणवीस यांचे घनिष्ठ संबंध आहेत,'' असं नवाब मलिक म्हणाले.

''फडणवीस ड्रग्स माफियांना संरक्षण देतात'' -

''जयदीप राणा यांच्यासोबत फडणवीसांचा काय संबंध आहे? याची चौकशी व्हायला पाहिजे. फडणवीसांच्या आशीर्वादाने महाराष्ट्रात ड्रग्सचे धंदे चालतात. जयदीप राणा हे फडणवीसांच्या घरच्या कार्यक्रमात उपस्थित राहतात. ड्रग्स रॅकेटला फडणवीस संरक्षण देतात'', असे आरोपही नवाब मलिकांनी केले आहेत.

जयदीप राणा साबरमतीमध्ये तुरुंगात -

''जयदीप राणा तुरुंगात बंद आहेत. दिल्लीतील एक प्रकरणामध्ये त्याला अटक करण्यात आली होती. एका सुनावणीवेळी त्याला न्यायालयात हजर करण्यात आले नव्हते. त्यावेळी एनसीबीने सांगितले होते, की तो तुरुंगात आहे. मात्र, आता हा साबरमती तुरुंगात बंद असल्याची माहिती मिळते. फडणवीसांसोबत त्याचे घनिष्ठ संबंध आहेत'', असंही मलिक म्हणाले.