NCP Crisis : राजकारणात बेरीज करायची असते, भागाकार-वजाबाकी होऊ नये म्हणून..; 'साहेब-दादा' भेटीवर काय म्हणाले जयंत पाटील?

सांगली : राष्ट्रवादी काँग्रेसमध्ये फूट पडली. त्यानंतर मी पक्षाचा अध्यक्ष म्हणून हा घरातील वाद घरातच संपावा, याच भावनेतून प्रयत्न करत आहे; पण त्याला आजघडीला मात्र यश आलेले नाही. वादाचा न्यायनिवाडा झाला नाही, तर आयोगाकडून नक्कीच होईल, असे स्पष्टीकरण राष्ट्रवादीचे प्रदेशाध्यक्ष जयंत पाटील (Jayant Patil) यांनी येथे केले.

शरद पवार-अजित पवार (Ajit Pawar) यांच्या भेटीबाबत पाटील यांनी हा खुलासा केला. महाविकास आघाडी खंबीर आणि एकसंध आहे, असेही त्यांनी सांगितले. प्रतापसिंह उद्यानातील पक्षी संग्रहालयाच्या भूमिपूजनासाठी श्री. पाटील सांगलीत आले होते. या वेळी त्यांनी पत्रकारांशी संवाद साधला.

शरद पवार (Sharad Pawar)-अजित पवार यांच्या भेटीबाबत ते म्हणाले, ‘‘राजकारणात बेरीज करायची असते. भागाकार, वजाबाकी होऊ नये, याची दक्षता पक्षाच्या अध्यक्षांनी घ्यायची असते. पक्षातील फूट टाळण्याचा आम्ही प्रयत्न करीत आहोत. पक्षातील अनेकजण प्रयत्नशील आहेत; पण त्याला यश आलेले नाही. शरद पवार यांची भूमिकाही स्पष्ट आहे.’’

भाजप प्रवेशाबाबत श्री. पाटील म्हणाले, ‘‘माझे सर्व पक्षातील नेत्यांशी संबंध आहेत. मध्यंतरी भाजप प्रवेशाच्या वावड्या उठल्या; पण असा पक्ष बदलता येतो का. मी एका पक्षाचा अध्यक्ष आहे. लोक बोलत असतात.’’

तेढ निर्माण करण्याचा प्रयत्न

शिवप्रतिष्ठानचे संभाजीराव भिडे यांच्याबाबत श्री. पाटील म्हणाले, ‘‘महात्मा गांधी यांच्याबद्दल ७५ वर्षांनंतर वक्तव्य करून त्यांची प्रतिमा मलिन करण्याचा प्रयत्न चुकीचा आहे. निवडणुका जवळ आल्याने राज्यातील सत्ताधाऱ्यांनी अनेकांना कामे वाटून दिली आहेत. जातीय तेढ निर्माण होऊन संघर्ष व्हावा, असा अप्रत्यक्ष प्रयत्न सुरू असल्याचे वाटते.’’

कळवा रुग्णालयातील रुग्णांचा मृत्यू गंभीर प्रकार

ठाणे महापालिकेच्या कळवा येथील छत्रपती शिवाजी महाराज रुग्णालयातील रुग्णांच्या मृत्यूचा प्रकार गंभीर आहे. मुख्यमंत्र्यांनी आपल्या रुग्णालयाकडे आधी बघावे. त्यात सुधारणा कराव्यात. ते नक्कीच ही बाब गांभीर्याने घेतील, असा टोला श्री. जयंत पाटील यांनी लगावला.