Maharashtra Politics : महाराष्ट्रात पुन्हा राजकीय भूकंप! अजित पवारांपाठोपाठ शिंदे-फडणवीस राजभवनाकडे रवाना

राज्यात राजकीय घडामोडींना पुन्हा एकदा वेग अला असून देवगिरी बंगल्यावर राष्ट्रवादीच्या आमदारांची बैठक झाल्यानंतर अजित पवार हे राजभवनात दाखल झाले आहेत. देवगिरी बंगल्यावरील बैठकीतून राष्ट्रवादीच्या कार्याध्यक्ष सुप्रिया सुळे, प्रुफल्ल पटेल हे बैठकीतून बाहेर पडले होते. यानंतर आता आजित पवार राष्ट्रवादीच्या आमदारांसह सरकारला पाठिंबा देणार असून ते उपमुख्यमंत्री म्हणून शपथ घेणार असल्याची माहिती समोर आली आहे.

अजित पवार यांच्यासोबत राष्ट्रवादीचा मोठा गट फुटल्याची माहिती सुत्रांनी दिली असून छगन भुजबळ हे देखील अजित पवार यांच्यासोबत कॅबिनेट मंत्री म्हणून शपथ घेतील. दरम्यान एकनाथ शिंदे आणि देवेंद्र फडणवीस हे देखील राजभवनाकडे रवाना झाले असल्याची माहिती मिळत आहे. साम टीव्हीने याबद्दलचे वृत्त दिले आहे.

दरम्यान मुख्यमंत्री एकनाथ शिंदे आणि उपमुख्यमंत्री देवेंद्र फडणवीस याच्या पाठोपाठ उद्य सामंत, शंभूराज देसाई यांच्यासह शिवसेनेचे सर्व प्रमुख नेते राजभवनाकडे रवाना झाले आहेत.

मागील काही दिवसांपासून अजित पवार नाराज असल्याची चर्चा होती. अजित पवारांनी जाहिररित्या पक्षामध्ये जबाबदारी मिळावी अशी मागणी केली होती. यासाठी त्यांनी १ जुलैचा अल्टिमेटम देखील दिला होता. मात्र त्यांच्या या मागणीची दखल न घेतल्याने अजित पवारांनी हा निर्णय घेतल्याचे मानले जात आहे.