Ajit Pawar: अजित पवारांच्या फेसबुक पेजचे व्हायरल होणारे स्क्रीनशॉट खोटे; राष्ट्रवादी पक्षाकडून खुलासा

मुंबई- राष्ट्रवादी काँग्रेसचे राष्ट्रीय अध्यक्ष आणि राज्याचे उपमुख्यमंत्री अजितदादा पवार यांच्या फेसबुक पेजचे काही स्क्रीनशॉट समाजमाध्यमांवर व्हायरल झाले होते. याप्रकरणी राष्ट्रवादी काँग्रेस आक्रमक झाली आहे. फेसबुक पेजचे खोटे स्क्रीनशॉट काढून समाजमाध्यमांवर जाणीवपूर्वक फेक न्यूज पसरविणाऱ्यांवर सायबर क्राईम अंतर्गत गुन्हे नोंद करण्यात यावेत. तसेच, संबंधितांवर कडक कायदेशीर कारवाई करण्यात यावी, अशी मागणी राष्ट्रवादी काँग्रेसचे प्रदेश सरचिटणीस आणि कोषाध्यक्ष आमदार शिवाजीराव गर्जे यांनी केली आहे.

उपमुख्यमंत्री अजितदादा पवार यांच्या अधिकृत फेसबुकचे खोटे स्क्रीनशॉट काढून समाजमाध्यमांवर जाणीवपूर्वक प्रतिमा हनन करण्याचा प्रकार सुरू आहे. उपमुख्यमंत्री अजितदादा पवार यांच्या फेसबुक पेजबाबतचे ते वृत्त निराधार, धादांत खोटे, खोडसाळपणाचे आहे असेही शिवाजीराव गर्जे यांनी म्हटले आहे.