Shivsena | बाळासाहेब ठाकरेंच्या नातवाचादेखील CM शिंदेंना पाठिंबा

मुंबई : मुख्यमंत्री एकनाथ शिंदे यांच्या बंडखोरीनंतर शिवसेनेतील ४० आमदारांनी उद्धव ठाकरे यांची साथ सोडली. यानंतर आता ठाकरे कुटुंबातून देखील शिंदे गटाला पाठिंबा दिला जात आहे. काही दिवसांपूर्वी स्मिता ठाकरे यांनी शिंदेची भेट घेतली होती यानंतर आता बाळासाहेब ठाकरे यांचे नातू आणि बिंदू माधव ठाकरे यांचे चिरंजीव निहार ठाकरे यांनी देखील एकनाथ शिंदे गटाला पाठिंबा जाहीर केला आहे. त्यामुळे आगामी काळात ते नव्या भूमिकेत दिसणार आहेत.

निहार ठाकरे हे शिवसेना पक्ष प्रमुख आणि माजी मुख्यमंत्री उध्दव ठाकरे यांचे पुतणे आहेत, तसेच त्यांच्या ठाकरे कुटुंबाशी असलेल्या संबंधामुळे आता राजकीय समिकरणे बदलणार आहेत. निहार ठाकरे यांनी शिंदे गटाला दिलेल्या पाठिंबा जाहीर करणं हा उद्धव ठाकरे यांना मोठा धक्का मानला जात आहे. निहार ठाकरे यांची याआधी ते कुठेही चर्चेत नव्हते तसेच त्यांना कुठल्याही राजकीय चळवळीत भाग देखील घेतलेला नाही. मात्र, एकनाथ शिंदे यांच्या बंडानंतर त्यांना समोर येत एकनाथ शिंदे यांना पाठिंबा जाहीर केला आहे. निहार ठाकरे हे बिंदू माधव यांचे पुत्र आहेत तर भाजपचे नेते हर्षवर्धन पाटील यांचे ते जावई आहेत.

दरम्यान निहार ठाकरे यांनी एकनाथ शिंदे यांची भेट घेतली, सोबत शिंदे गटाच्या भारतीय कामगार सेनेचे पदाधीकारी किरण पावसकर यांच्या उपस्थितीत निहार ठाकरे यांनी शिंदे गटाला पाठिंबा दिला आहे.

दुसरीकडे मंत्रिमंडळ विस्तार रखडल्याने विरोधकांकडून राज्याती शिंदे-फडणवीस सरकारवर जोरदार हल्लाबोल केला जात आहे. या सर्वामध्ये मंत्रिमंडळाच्या विस्ताराबाबत मुख्यमंत्री एकनाथ शिंदे आणि केंद्रीय गृहमंत्री अमित शहा यांच्यात चर्चा झाल्याचे सांगितले जात आहे. दोन्ही नेत्यामध्ये विस्ताराच्या फॉर्मूल्याबाबत चर्चा झाल्याची माहिती सूत्रांनी दिली. त्यामुळे राज्यातील शिंदे फडणवीस सरकारचा रखडलेला मंत्रिमंडळ विस्तार ललकरच होऊ शकतो या चर्चांना पुन्हा एकदा जोर धरला आहे. दोन्ही नेत्यामध्ये झालेल्या चर्चेमध्ये 60-40 असा फॉर्मुला ठरल्याचे कळतंय. एवढेच नव्हे तर 31 जुलैनंतर राज्यातील मंत्रिमंडळाचा विस्तार केला जाऊ शकतो अशी शक्यता वर्तवली जात आहे.