शिवसेना नेत्यांच्या उधळपट्टीवर राणे भडकले; दौऱ्याला जाताय की....

रत्नागिरी : जिल्हा परिषद कृषी विभागाकडून आयोजित मध्यप्रदेशमधील (Madhya Pradesh) शेतकरी (Farmer)दौऱ्‍यात पदाधिकारी, अधिकारी, सदस्यांसह नातेवाईकांचा भरणा असल्याच्या चर्चेला तोंड फुटले आहे. दौऱ्‍यासाठी निकष कोणते काय असतात आणि त्याचे पालन झाले का, याबाबत चौकशी करण्याची मागणी केली जात आहे. दरम्यान, भाजप नेते निलेश राणे (Nilesh Rane)प्रचंड आक्रमक झाले आहेत. जिल्हा परिषद दिवाळखोरीत असल्याने रस्ते, शाळांसाठी निधीची कमतरता जाणवत आहे. अशा परिस्थितीत शिवसेनेचे सदस्य गरिबांचा पैसा वापरुन सहली काढत आहेत, असा दावा निलेश राणे यांनी केला.

शेतकऱ्‍यांना नाविन्यपूर्ण उपक्रम तसेच शेतीसाठी प्रोत्साहन मिळावे, यासाठी कृषी विभागातर्फे दरवर्षी राज्याबाहेर किंवा परजिल्ह्यात एक शेतकरी अभ्यास दौरा काढला जातो. यासाठी शासनामार्फत तरतूदही केली जाते. गेली दोन वर्षे कोरोनामुळे हा अभ्यास दौरा काढला नव्हता. यावर्षी शेतकरी दौरा मध्य प्रदेशमध्ये काढला आहे. सोमवारी (ता. ६) हे सर्वजणं मध्यप्रदेशला रवाना झाले असून गुरूवारी (ता. ९) हा दौरा समाप्त होणार आहे. यात एकूण २७ जणं सहभागी असल्याची माहिती आहे. यामध्ये शेतकऱ्‍यांबरोबरच पदाधिकारी, सदस्य, पदाधिकाऱ्‍यांचे नातेवाईक यांचीच संख्या अधिक आहे.

दौरा काढण्यापूर्वी तांत्रिकदृष्ट्या आवश्यक त्या गोष्टींची पूर्तता केली आहे. मुंबईतून विमानाने हे सर्वजण मध्यप्रदेशला गेल्याची चर्चा सोशल मीडियावर सुरू आहे. विमानातील तसेच विमानतळाबाहेरील फोटो व्हायरल झाल्यामुळे चर्चेला तोंड फुटले आहे. या दौऱ्यासाठी लाखोंचा निधी खर्ची टाकल्याने शेतकऱ्यांच्या सहलीच्या नावाखाली उधळपट्टी सुरू असल्याची चर्चा असून याबाबत नागरिकांकडून तीव्र नाराजी व्यक्त होत आहे.

शिवराजसिंग चव्हाण मंत्रीमंडळाने मध्यप्रदेशात शेतीमध्ये खुप मोठी क्रांती केली आहे. ते पाहण्यासाठी दौऱ्‍याचे नियोजन केले असते तर निश्‍चितच त्याचे स्वागत केले असते. परंतु सोशल मिडीयावर व्हायरले झालेले फोटो आणि वृत्त पाहता सगे सायरे यांना घेऊन दौरा केल्याचे दिसत आहे. हा एकप्रकारे जनतेच्या पैशाचा अपव्यय ठरेल.

- अ‍ॅड. दीपक पटवर्धन, जिल्हाध्यक्ष, भाजप.