भाजपला फक्त १ हजार रुपये द्या, नितीन गडकरींचं नागरिकांना आवाहन

मुंबई : केंद्रीय रस्ते व वाहतूक मंत्री नितीन गडकरी हे आपल्या कामासाठी ओळखले जातात. तसेच ते नेहमी आपल्या वैशिष्ट्यपूर्ण कामांसाठी चर्चेत असतात. आज शनिवारी (ता.२५) त्यांनी आपला पक्ष भारतीय जनता पक्षाला (BJP) एक हजार रुपयांचा पक्ष निधी दिला आहे. याबाबत त्यांनी धनादेशाचे छायाचित्र ट्विट करुन माहिती दिली आहे. केंद्रीय मंत्री नितीन गडकरी (Nitin Gadkari) ट्विटमध्ये म्हणतात, की विनम्रतेने भारतीय जनता पक्षाला (भाजप) एक हजार रुपयांचा पक्ष निधी दिला आहे. (Nitin Gadkari Appeal To People Contribute One Thousand Rupees For BJP)

राष्ट्रवाद, सुशासन, विकास आणि अंत्योदय हे भारतीय जनता पक्षाचे आधारस्तंभ आहेत. मी आपण सर्वांना विनंती करतो की आमच्या कॅडरसाठी तुम्ही या प्रकारचे योगदान देऊन त्यांना सक्षम करा. त्यातून निःस्वार्थीपणे देशाची सेवा अविरत करता येईल, असे गडकरी म्हणाले. एडीआर (ADR) संस्थेने केलेल्या सर्वेनुसार भारतात सर्वाधिक निधी खासगी संस्था, व्यक्ती, कंपन्या यांच्याकडून भारतीय जनता पक्षाला निधी मिळाला आहे. आताच्या घडीला भारतात सर्वाधिक श्रीमंत पक्ष म्हणून भाजपची ओळख निर्माण झाली आहे.