गडकरी चांगला माणूस पण चुकीच्या पक्षात - चव्हाणांनी केलं कौतुक

भाजपचे केंद्रीय मंत्री नितीन गडकरी यांच्यावर काँग्रेस नेते अशोक चव्हाण यांनी कौतुकाची थाप मारली आहे. केंद्रातील भाजप सरकारची कामगिरी उणे आहे. असं असतानाही केंद्रीय मंत्री नितीन गडकरी यांचं कामकाज चांगलं आहे. गडकरी म्हणजे, चुकीच्या पक्षातील चांगला आणि कार्यक्षम माणूस आहे, असं वक्तव्य अशोक चव्हाण यांनी केलं आहे. 30 मे रोजी केंद्रातील मोदी सरकारला सात वर्ष पूर्ण झाली. केंद्र सरकारच्या कारभाराचे मूल्यमापन करण्याच्या उद्देशाने काँग्रेसनं आयोजित केलेल्या पत्रकार परिषदेत ते बोलत होते. नोटबंदी, जीएसटी याचबरोबर करोना हाताळणीत केलेल्या चुकांमुळे ‘ गंगा मैली’ झाल्याचे सांगत त्यांनी केंद्र सरकारवर टीका केली.

मोदी सरकारवर टीकास्त्र सोडताना अशोक चव्हाण यांनी रस्ते विकास आणि वाहतूक क्षेत्रातील गडकरींच्या कामावर कौतुकांचा वर्षाव केला. ते म्हणाले की, अधिकार काढून घेण्याचे प्रयत्न केंद्र सरकारकडून केले जात असून गडकरी यांची कोंडी केली जात आहे. नितीन गडकरी यांचं काम चांगलं आहे. गडकरी म्हणजे, चुकीच्या पक्षातील चांगला आणि कार्यक्षम माणूस आहे, असं चव्हाण म्हणाले.

अंतिम संस्काराचा अंतिम अधिकार नाकारण्यासारखे दुसरे कोणते पाप असू शकत नाही. पण ते पापसुद्धा मोदी सरकारच्या काळात झाले. पत्रे ठोकून स्मशाने चिरेबंदी आणि वाहत्या प्रवाहात व किनाऱ्यावर शेकडो मृतदेह सोडून गंगेला मलीन करण्याचे महापाप या सरकारने केले. शेकडो मृतदेह गंगेत प्रवाहित होऊ देणाऱ्या मोदी सरकारला पाहून राज कपूर यांनी दिग्दर्शीत केलेल्या चित्रपटातील 'राम तेरी गंगा मैली हो गई, पापीयों के पाप धोते-धोते' या गाण्याची आठवण होते. मोदी सरकारने या गाण्यातील शब्द प्रत्यक्षात उतरवले आहेत.

काँग्रेसला स्वातंत्र्य चळवळीची परंपरा आहे, इतिहास आहे. देशासाठी बलिदान आणि योगदान देणाऱ्या अनेक ऐतिहासिक महान नेत्यांचा वारसा आहे. पण भाजपकडे यातलं काहीच नाही. ना गौरवशाली इतिहास आहे, ना परंपरा आहे, ना वारसा आहे. या न्युनगंडाने भाजप पछाडली आहे. आम्ही काँग्रेसपेक्षा कमी नाही, हे दाखवून देण्यासाठी भाजप काही तरी ऐतिहासिक करण्याचा आव आणते. पण इतिहास घडवण्यासाठी वर्तमानाचे भान आणि भविष्याचे नियोजन असावे लागते. भाजपकडे नेमका त्याचाच अभाव आहे. केवळ भाषणे, स्टंट आणि इव्हेंट करून इतिहास घडत नाही, असे चव्हाण म्हणाले.