गांधीजींविरोधात धार्मिक नेत्याचं आक्षेपार्ह विधान, राऊतांचा मोदींवर हल्लाबोल

मुंबई : छत्तीसगड येथील रायपूर येथे दोन दिवसीय धर्म संसद (Chhatisgarh Dharm Sansad) भरविण्यात आली होती. यामध्ये महाराष्ट्रातील धार्मिक नेता कालीचरण यांनी महात्मा गांधींबद्दल (Mahatma Gandhi) आक्षेपार्ह विधान केलं. त्यानंतर आता काँग्रेसचे मंत्री नितीन राऊत (Maharashtra Minister Nitin Raut) यांनी थेट पंतप्रधान मोदींना (PM Modi) सवाल करत कालीचरण यांच्यावर देशद्रोहाचा गुन्हा दाखल करण्याची मागणी केली आहे.

देशद्रोहाचा गुन्हा दाखल करा -

ज्याठिकाणी राष्ट्रपिता महात्मा गांधींना मंचावरून शिव्या घातल्या जातात, त्याच ठिकाणी बसलेले लोक टाळ्या वाजवतात. नरेंद्र मोदीजी आपण देशाला काय बनवून ठेवलंय? महात्मा गांधींच्या विरोधात आक्षेपार्ह विधान करणाऱ्यांवर देशद्रोहाचा गुन्हा दाखल करणे हीच खरी बापूंना श्रद्धांजली असेल असं नितीन राऊत म्हणाले.

धार्मिक नेत्यांची भडकाऊ भाषणं -

रायपूर येथे एनजीओ नीलकंठ सेवा समिती आणि दूधधारी मठ यांनी दोन दिवसीय धर्मपरिषद आयोजित केली होती. या कार्यक्रमात काँग्रेस नेते प्रमोद दुबे आणि भाजप नेते ब्रिजमोहन अग्रवाल आणि विष्णू देव साई उपस्थित होते. तसेच देशभरातील २० पेक्षा अधिक धार्मिक नेत्यांनी सहभाग घेतला होता. यावेळी काही नेत्यांनी हिंदू राष्ट्रासाठी हातात शस्त्र घेण्यास सनातनी हिंदूना सांगितले. तसेच इतर धर्माबद्दल भडकाऊ भाषण केली.

कालीचरण यांचं महात्मा गांधींविरोधात वक्तव्य -

अकोला येथील धार्मिक नेता कालीचरण यांनी महात्मा गांधींबद्दल अत्यंत खालच्या दर्जाचं आणि अपमानकार विधान केलं. तसेच नथुराम गोडसेला नमस्कार करतो, असं ते म्हणाले. अल्पसंख्याक समाज विविध देशांचे राजकारण आणि प्रशासन नियंत्रित करण्याचा प्रयत्न केल्याचा आरोप केला. त्यांच्या या विधानानंतर संसदेचे संयोजक आणि दूधधारी मठाचे प्रमुख महंत राम सुंदर दास यांनी तीव्र निषेध नोंदविला. त्यानंतर रविवारी रात्री उशिरा कालीचरण विरुद्ध आयपीसी कलम ५०५(२) आणि २९४ अंतर्गत एफआयआर नोंदवण्यात आला.