राज्यात कुपोषणामुळे एकही मृत्यू नाही; मंत्र्यांची माहिती, अजित पवार भडकले!

राज्यात कुपोषणामुळे एकही बालमृत्यू झालेला नाही, असं विधान आज अधिवेशनात आदिवासी मंत्री विजयकुमार गावित यांनी केलं आहे. याच मुद्द्यावरुन विरोधकांनी सरकारला चांगलंच धारेवर धरलं आहे. विरोधी पक्षनेते अजित पवार यांनी आदिवासी विकास मंत्री विजयकुमार गावित यांना कोंडीत पकडलं आहे.

आज पावसाळी अधिवेशनाचा पाचवा दिवस आहे. या दिवशी राज्याचे आदिवासी विकास मंत्री यांना विरोधकांनी कुपोषणामुळे झालेल्या बालमृत्यूंची आकडेवारी सादर करण्यास सांगितलं. गेल्या पाच वर्षांच्या काळात १६ आदिवासी जिल्ह्यांत कुपोषणामुळे ८ हजार ८४२ मृत्यू झाले का? याबद्दल विचारणा झाली. त्यावर गावित यांनी दिलेल्या माहितीनुसार, महाराष्ट्रात कुपोषणामुळे बालमृत्यू झालेला नाही. आरोग्य तसंच महिला बाल कल्याण विभागाने ही माहिती दिल्याचं गावित यांनी सांगितलं.

या उत्तराला दिलीप वळसे पाटील आणि अजित पवार यांनी आव्हान देत आक्षेप घेतला. तर विधानसभा अध्यक्ष राहुल नार्वेकर यांनीही गावित यांच्या उत्तराची दखल घेतली. कुपोषण आणि बालमृत्यूबाबत पुन्हा माहिती घ्या आणि उद्या याचं उत्तर द्या, असे निर्देश देत हा प्रश्न राखून ठेवला आहे.