Monsoon Assembly Session: 'त्यांची-आमची जुनी ओळख!' पहिल्याच दिवशी जयंत पाटलांचा अजित पवारांना मिश्किल चिमटा

अजित पवार यांच्या आणि इतर 8 नेत्यांनी शिवसेना-भाजप सोबत जाण्याचा निर्णय घेतला. त्यानंतर राष्ट्रवादी काँग्रेसमध्ये मोठी फूट पडली आहे. अजित पवारांनी राष्ट्रवादीच्या ८ आमदारांसह मंत्रीपदाची शपथ घेतली. अजित पवारांनी उपमुख्यमंत्रीपदाची शपथ घेतली आणि राज्याच्या राजकीय वर्तुळात खळबळ उडाली आहे. या दरम्यान १७ जुलै म्हणजेच आजपासून सुरू झालेल्या पावसाळी अधिवेशनात राजकीय खडाजंगी पाहायला मिळण्याची शक्यता आधीपासून वर्तवली जात होती. विधानसभेचं कामकाज सुरू झाल्यानंतर पहिल्या काही मिनिटांमध्ये त्याचा प्रत्यय आला आहे.(Latest Marathi News)

अधिवेशनाच्या पहिल्याच दिवशी विधानसभेच्या सभागृहाचं कामकाज सुरू होताच विधानसभा अध्यक्षांनी मुख्यमंत्री एकनाथ शिंदे यांना नव्या मंत्र्यांचा परिचय करण्याचे निर्देश दिले. त्यानंतर मुख्यमंत्री एकनाथ शिंदेंनी उभं राहून नव्या मंत्र्यांची माहिती सभागृहाला द्यायला सुरुवात केली. एकनाथ शिंदे यांनी नव्या मंत्र्यांचा परिचय द्यायला सुरुवात केली. (Marathi Tajya Batmya)

एकनाथ शिंदे यांनी अजित पवारांचा परिचय करून देताना उपमुख्यमंत्री व वित्त म्हंटलं आणि त्यांनी पलीकडच्या बाकावर बसलेल्या अजित पवारांकडे पाहिलं. त्यानंतर बाजूलाच बसलेल्या देवेंद्र फडणवीसांनी एकनाथ शिंदेंना 'नाव सांगा', असं म्हटल्यानंतर एकनाथ शिंदेंनी अजित पवारांचं नाव घेतलं.(Latest Marathi News)

शिंदेंनी परिचय करून देताच अजित पवारांनी उभं राहात सगळ्यांना नमस्कार करून अभिवादन केलं. अजित पवार बसत असतानाच समोर विरोधी बाकांवर बसलेल्या राष्ट्रवादी काँग्रेसच्या शरद पवार गटाचे आमदार जयंत पाटील यांनी मिश्किलपणे 'त्यांची-आमची जुनी ओळख आहे' म्हणत कमेंट केली आहे. जयंत पाटील यांच्या बोलण्याने सभागृहात हशा पिकला. इतर नेत्यांसह अजित पवारांच्याही चेहऱ्यावरही हसू उमटले! (Marathi Tajya Batmya)

अजित पवारांनंतर मुख्यमंत्री एकनाथ शिंदे यांनी अजित पवार गटातील इतर मंत्र्यांचाही परिचय सभागृहाला करून दिला. यामध्ये छगन भुजबळ, दिलीप वळसे पाटील, हसन मुश्रीफ, धनंजय मुंडे, धर्मरावबाबा अत्राम, संजय बनसोडे, आदिती तटकरे, अनिल पाटील या नव्या मंत्र्यांची नावे आणि खाती मुख्यमंत्र्यांनी सांगितली.(Latest Marathi News)