'जाती जातीत विष कालवणारे महाराष्ट्र द्रोहीच', मनसेचा राष्ट्रवादीवर हल्लाबोल

मुंबई: नागपूरचे राष्ट्रवादी काँग्रेसचे आमदार अमोल मिटकरी (ncp mla amol mitkari) यांच्या बोचऱ्या टीकेनंतर मनसेचे (mns) नेते खवळले आहेत. अमोल मिटकरी यांनी राज ठाकरेंवर (Raj thackeray) मनसेच्या जिव्हारी लागेल अशी टीका केली आहे. मनसेच्या नेत्यांनी अमोल मिटकरी यांना इशारा देतानाच, राष्ट्रवादी काँग्रेसवरही हल्लाबोल केला आहे. "नाव राष्ट्रवादी आणि राजकारण संकुचित असलेल्या लोकांनी आम्हाला राष्ट्रद्रोही म्हणणे म्हणजे बौद्धिक दिवाळखोरीच. महाराष्ट्रात जाती जातीत (cast issue) विष कालवणारे महाराष्ट्र द्रोहीच" असं टि्वट मनसेचे नेते संदीप देशपांडे यांनी केलं आहे.

नेमकं काय प्रकरण आहे?

मनसे अध्यक्ष राज ठाकरे (Raj thackeray) यांनी अलीकडेच 'राज्यात राष्ट्रवादी काँग्रेस पक्षाच्या जन्मानंतर जातीचा मुद्दा (cast issue) मोठा होत गेला' असं वक्तव्य केलं. त्यावर राष्ट्रवादी काँग्रेसचे अध्यक्ष शरद पवार यांनी राज ठाकरेंना प्रत्युत्तर दिलं. काल पुण्यात बोलताना राज ठाकरेंनी आपणं आपल्या वक्तव्यावर ठाम असल्याचं सांगितलं. "मी प्रबोधनकारांची पुस्तकं आणि यशवंतराव चव्हाण पण वाचलेत. मी जे बोललोय त्याच्याशी आजोबांचं काय संबंध?" असं राज ठाकरेंनी शरद पवारांना प्रत्युत्तर दिलंय.

अमोल मिटकरी काय म्हणाले?

‘राष्ट्रवादी पक्षावर जातीयवादाचा आरोप कोण करतोय तर ज्यांनी महाराष्ट्रात दक्षिण भारतीय व उत्तर भारतीय हा द्वेष निर्माण करण्याचे महापातक करून “राष्ट्रद्रोह” केला ती व्यक्ती! अपयशी नेत्याला उत्तर देणे म्हणजे घाणीवर दगड फेकून अंगावर घाण उडवून घेणे आहे’, अशा शब्दात अमोल मिटकरी यांनी राज ठाकरे यांच्यावर हल्लाबोल केला.