पंकजा मुंडेंनी टाळलं फडणवीसांचं कौतुक, म्हणाल्या, हे तर काहीच नाही...

सध्या राज्याचं राजकीय वातावरण चांगलंच तापलं आहे. अनेक नाटकीय राज्यमय घडोमोडींमुळे हे वातावरण आणखी चिघळण्याची शक्यता आहे. दरम्यान, राज्यसभेनंतर आता विधान परिषदेतही भाजपने बाजी मारली आहे. या पार्श्वभूमीवर विरोधी पक्षनेते देवेंद्र फडणवीस यांचे कौतुक सुरु आहे. दरम्यान, भाजपमधील नाराज नेत्या पंकजा मुंडे यांनी फडणवीसांचे कौतुक टाळून वडील आणि दिवंगत नेते गोपीनाथ मुंडे यांच्या अशाच एका जुन्या कामगिरीचा उल्लेख केला आहे. मुंडे आज अहमदनगरच्या दौऱ्यावर आहेत. (pankaja munde direct taunt to devendra fadnavis)

गोपीनाथ मुंडे यांनी एकट्याने सत्ताधारी पक्षाचे १७ सदस्य फोडल्याची आठवण पंकजा मुंडे यांनी करून दिली आहे. आता तरी दिल्लीचे पाठबळ असल्याकडे निर्देश करुन तेव्हाच्या तुलनेत सध्याचे काम सोपे असल्याचेच सांगण्याचा त्यांनी प्रयत्न केला आहे. यांसदर्भात त्या म्हणाल्या की, राज्यसभा निवडणुकीनंतर हा निकाल अपेक्षितच होता. यामध्ये विजयी झालेल्या सर्व पक्षांच्या उमेदवारांचे अभिनंदन करते. भाजपचे पाचही उमेदवार निवडून आले. राष्ट्रवादी, शिवसेना आणि काँग्रेसच्या विजयी उमेदवारांचेही अभिनंदन. कालचा निकाल सर्वांना अपेक्षित होता, असं त्यांनी स्पष्ट केलं आहे.

पुढे त्या म्हणाल्या की, संख्याबळावर केलेले काम समाजकारण असते तर संख्याबळ नसताना केलेले ते राजकारण असते. संख्याबळ नसताना इतरही अनेक निवडणुका आम्ही लढवल्या आहोत आणि जिंकल्याही आहेत. त्या जिल्हा परिषद किंवा इतर स्थानिक स्वराज्य संस्थांच्या निवडणुका असो, तेथे संख्याबळ कमी असूनही आम्ही लढलो आणि जिंकलो आहोत.

मला आठवते की एका निवडणुकीत गोपीनाथ मुंडे यांनी सत्ताधारी पक्षाची १७ मते फोडली होती. तेही एकट्याने. कोणतेही सामर्थ्य पाठीशी नसताना हे काम केले होते. मात्र, आता आमच्या पाठीशी दिल्लीतून पंतप्रधान नरेंद्र मोदी यांच्या रुपाने मोठे सामर्थ्य उभे आहे. विकासाची दृष्टी देण्याचा ते प्रयत्न करत आहेत. नक्कीच याचा परिणाम होतो आहे, असे मला वाटते. आता या निकालाचे राज्याच्या राजकारणावर काय परिणाम होणार, यावर मी भाष्य करणे योग्य नाही. कारण त्या प्रक्रियेत मी नाही, असंही पंकजा मुंडे यांनी सांगितलं आहे.