पंकजा मुंडे म्हणाल्या, काही गैरसमज असतील तर फडणवीसांनी व्यक्त व्हावं

सध्या राजकारणात घडामोडींचा वेग वाढला आहे. निवडणुकांच्या पार्श्वभूमीवर सध्या राजकीय नेत्यांचे दौरे आणि गाठीभेटींनीही वेग घतेला आहे. दरम्यान, यानिमित्ताने भाजपा नेत्या पंकजा मुंडे यांच्यासंदर्भातील एक वेगळी बातमी समोर येत आहे. एका खासगी वृत्तवाहिनीला मुलाखत दिली आहे. यावेळी त्यांना विरोधी पक्षनेते देवेंद्र फडणवीस यांच्यासंदर्भात विचारणा केली असता मुंढे यांनी फडणवीसांचं कौतुक केलं आहे.

देवेंद्र फडणवीसांचा एक चांगला गुण आणि त्यांच्यासाठी कोणता सल्ला द्याल असे विचारले असता पंकजा मुंडे म्हणाल्या की, देवेंद्र फडणवीस हे अत्यंत संयमी नेते आहेत. त्यांना काही वाटत असेल किंवा गैरसमज झाले असतील तर त्यांनी ते व्यक्त करायला हवेत. त्यांनी अशा गोष्टी मनात ठेवू नयेत, अशी अपेक्षा त्यांनी व्यक्त केली आहे.

काही दिवसांपूर्वीच देवेंद्र फडणवीस (Devendra Fadnavis) यांनीही पंकजा मुंडे यांना विधानपरिषदेची उमेदवारी देण्याविषयी सकारात्मक संकेत दिले होते. दरम्यान, पंकजा मुंडे (Pankaja Munde) यांच्या या वक्तव्यामुळे त्यांनी आता देवेंद्र फडणवीसांशी जुळवून घेण्याची भूमिका घेतली आहे का? असा सवाल राजकीय वर्तुळातून विचारला जात आहे.

या कार्यक्रमात पंकजा मुंडे यांनी अनेक मुद्द्यांवर भाष्य केले. त्यावेळी तुम्हाला मुख्यमंत्री व्हायचे आहे का, या प्रश्नावर मुंडे म्हणाल्या, अजिबात नाही. सध्या जे चालू आहे ते पाहता मी आहे तिथेच बरी असल्याची प्रतिक्रिया त्यांनी दिली आहे. यावेळी पंकजा मुंडे यांनी एखादे गाणे म्हणण्याचा आग्रेह केला असता त्या म्हणाल्या, मी राजकारणात असल्याने गाणे गाण्याची गरज नाही, मात्र तरीही त्यांनी गायलेल्या गाण्यावर चर्चा सुरु आहे. 'हमारी मुठ्ठी मै आकाश सारा, जब भी खुलेगी चमकेगा तारा' या गाण्याच्या ओळी त्या गायल्या आहेत.

पंकजा मुंडे विधानपरिषदेत जाणार?

येत्या २० जून रोजी विधान परिषदेच्या १० जागांसाठी निवडणूक होत आहे. विधानससभेतील संख्याबळानुसार भाजपचे ४, राष्ट्रवादी आणि शिवसेनेचे प्रत्येकी २, काँग्रेसचा एक आणि १० व्या जागेसाठी पुन्हा भाजप आणि महाविकास आघाडीमध्ये चुरस होण्याची शक्यता आहे. यावेळी भाजपकडून पंकजा मुंडे यांना संधी दिली जाऊ शकते, अशी चर्चा राजकीय वर्तुळात रंगली आहे. पंकजा मुंडेही या जबाबदारीसाठी इच्छूक आहेत. मला विधान परिषदेवर पाठवावं, ही कार्यकर्त्यांची मनापासून इच्छा आहे, असे त्यांनी यावेळी स्पष्ट केलं होत्या.