नव्या शैक्षणिक वर्षाच्या सुरुवातीलाच पालकांना महागाईचा दणका; वही २५ टक्क्यांनी तर पेनांच्या दरात २० टक्क्याची वाढ New academic year

नागपूर: लवकरच नव्या शैक्षणिक वर्षाला सुरुवात होणार आहे. त्या पार्श्वभूमीवर पेन, पेन्सिल, वह्या, पुस्तकांपासून गणवेशापर्यंत सगळ्या खरेदीला वेग येईल. पण वाढत्या महागाईचा फटका आता शालेय जीवनावरही होत आहे. वह्या, पुस्तके खरेदी करायला जाणाऱ्यांच्या खिशाला कात्री लागणार आहे. वह्या आणि पेनच्या दरात २० ते २५ टक्यांनी वाढ झाली आहे.

मागील वर्षाच्या तुलनेत नोटबुकच्या दरामध्ये २५ टक्क्यांनी वाढ झाली असून त्यापाठोपाठ पेन व शाईच्या दरातही १० ते १५ टक्क्यांची वाढ झाली आहे. पूर्वी १०० पेजेसचे नोटबुक २० रुपयांचे होते. तेच आता वाढून २५ रुपयांचे झाले आहे. तीन रुपयांचे मिळणारे पेन ५ ते ६ रुपयांचे झाले. दप्तर, वॅाटर बॅाटल्स व प्रवासही महागला आहे. ही २५ टक्के स्पष्ट वाढ पालकांच्या डोक्याला ताप होणार हे नक्की. यामुळे सामान्य कुटुंबातील पालक आणि विद्यार्थ्यांसमोर अडचणी वाढू लागल्या आहेत.

दरवर्षी शालेय साहित्याच्या किमतीमध्ये ६ ते १० टक्क्यांची वाढ अपेक्षित असते. परंतु यंदा ही वाढ मोठी आहे. बालभारतीच्या पुस्तकांच्या किमती कायम असल्याने पालंकाना काहीसा दिलासा मिळाला आहे. परंतु स्पर्धापरिक्षांच्या पुस्तकांमध्ये आठ ते दहा टक्क्यांची वाढ झाली आहे.

अशी झाली वाढ

नोटबुक २५ टक्के

पेन १५ ते २० टक्के

शाई १० टक्के

गणवेश २० टक्के

दप्तर १५ ते २० टक्के

भाज्या, गॅस, तेल व कडधान्यासारख्या जीवनावश्यक वस्तूंचे दर आधीच गगनाला भिडले आहेत. त्यात आता मुलांच्या शैक्षणिक साहित्याच्या किमतीदेखील वाढल्याने घरखर्चावर अधिक ताण वाढला आहे. वह्या व इतर वस्तूंचे दर वाढले असले तरी मुलांच्या शिक्षणासाठी खरेदी करावीच लागणार आहे. यामुळे चालू महिन्याचे बजेट कोलमडणार आहे.

- नीलिमा जोगी, गृहिणी.

कागद बनविण्यासाठी लागणाऱ्या कच्च्या मालाचे दर वाढल्यामुळे वह्यांच्या किमती वाढल्या आहेत. मागील वर्षीच्या तुलनेत यंदा वह्या, नोटबुकच्या किमतीत २० ते २५ टक्क्यांनी वाढ झाली आहे. याशिवाय पेन, शाईच्या दरातही वाढ झाली आहे.

- जयंत घारपुरे, विक्रेते.