‘ग्लोबल महाराष्ट्र’मध्ये ४०० शाळांचा सहभाग

मुंबई : भारतीय स्वातंत्र्याच्या अमृत महोत्सवाचा एक भाग म्हणून जर्मनीत राहणाऱ्या मराठी नागरिकांनी हाती घेतलेल्या ‘ग्लोबल महाराष्ट्र’ या उपक्रमात महाराष्टातील शाळा जोडणे व मार्गदर्शनपर उपक्रमात राज्यातील ४०० हून अधिक शाळांमधून शिक्षक व विद्यार्थी सहभागी झाले होते.

जागतिक विद्यार्थी दिनानिमित्त म्युनिक (जर्मनी) येथील भारतीय वाणिज्य दूतावासाने सोमवारी व्हिडिओ कॉन्फरन्सिंग आयोजित करीत हा उपक्रम राबविला. जर्मनीमधील भारतीय परराष्ट्र सेवेतील मराठी अधिकारी डॉ. सुयश यशवंतराव चव्हाण यांनी सर्वांचे स्वागत केले. चव्हाण हे मूळचे नांदेडचे आहेत. यावेळी भारतीय वाणिज्य दूतावासाचे मोहित यादव, खासदार प्रियांका चतुर्वेदी, ‘सकाळ’चे संपादक- संचालक श्रीराम पवार, ‘सकाळ’चे मुख्य कार्यपालन अधिकारी महेंद्र पिसाळ, जर्मनीतील महाराष्ट्र मंडळाचे प्रमुख अभिजित माने, सदस्य प्रीती राव, दुर्गा खटखटे, केदार जाधव, ऋतुजा शेट्ये यांच्यासह राज्यातील ४०० हून अधिक शाळांमधून शिक्षक व विद्यार्थी सहभागी झाले होते.

मोहित यादव यांनी या उपक्रमाचे कौतुक करत राज्यातील विद्यार्थ्यांना एक मोठी संधी निर्माण होईल, असा विश्‍वास व्यक्त केला. ‘पुढील काळात पर्यावरण, पर्यटन, उद्योग या क्षेत्रांतही हा उपक्रम राबविल्यास मोठा फायदा होईल, अशी अपेक्षा प्रियांका चतुर्वेदी यांनी व्यक्त केली. या उप्रकमासाठी घेतलेल्या पुढाकाराबद्दल डॉ. सुयश चव्हाण यांनी ‘सकाळ’चे अभिनंदन केले. यापुढील काळात हा उपक्रम सुरु राहणार असल्याचे त्यांनी सांगितले.

‘माय मराठी शाळा’

जर्मनीतील मराठी कुटुंब नेहमीच एकत्र येत सण व उत्सव साजरे करीत असल्याचे सांगून महाराष्ट्र मंडळातर्फे मराठी ग्रंथालय, जर्मनीत नव्याने येणाऱ्या मराठी व्यक्तीस मार्गदर्शन, स्थानिक लोकांसाठी दिवाळी अंक आदी उपक्रम सुरु केल्याचे प्रीती राव यांनी सांगितले. जर्मनीत सुरु करण्यात आलेल्या ‘माय मराठी शाळा’ या योजनेची माहिती दुर्गा खटखटे यांनी दिली. यावेळी ऋतुजा शेट्ये यांनी जर्मनीतील शिक्षणातील त्यांचे अनुभव सांगितले. केदार जाधव जर्मन भाषा व शिक्षणातील नवीन संधींबदल माहिती देत यापुढील काळात जर्मनीत कुशल मनुष्यबळाची गरज असून उच्च शिक्षणासाठी मोफत व उत्तम दर्जाच्या शिक्षणाची संधी उपलब्ध असल्याचे सांगितले.