Pooja Khedkar: पूजा खेडकरांनी धुडकावली पुणे पोलिसांची नोटीस? जबाब नोंदवण्यासाठी अद्याप वाशिममधून पुण्याकडं रवाना नाही

पुणे : ट्रेनी आयएएस अधिकारी पूजा खेडकर या आपल्या वादग्रस्त कारनाम्यांमुळं सध्या चांगल्याच गोत्यात आल्या आहेत. पुण्याच्या जिल्हाधिकाऱ्यांवर त्यांनी नुकतेच आरोप केले होते. यासंदर्भात लेखी जबाब नोंदवण्यासाठी आज पुण्यात उपस्थित राहण्याची नोटीस त्यांना पुणे पोलिसांनी दिली होती.

पण अद्याप त्या वाशिममध्येच असल्याचं सुत्रांकडून कळतंय, त्यामुळं पूजा खेडकर यांच्या अडचणी वाढण्याची शक्यता आहे. (Pooja Khedkar defied orders of Pune Collector there is no departure from Washim)

साम टीव्हीच्या माहितीनुसार, पुण्याच्या जिल्हाधिकाऱ्यांवर केलेल्या आरोपांप्रकरणी लेखी जबाब नोंदवण्यासाठी पुणे पोलिसांनी पूजा खेडकर यांना हजर राहण्याबाबत नोटीस बजावली होती. हा जबाब नोंदवण्यासाठी त्यांना पुण्यात लेखी जबाब नोंदवणं गरजेचं होतं. पूजा खेडकर यांची सध्या वाशिम इथं प्रशिक्षणार्थी म्हणून नियुक्ती करण्यात आली आहे. त्यासाठी त्यांनी काल रात्रीच वाशिम इथून पुण्याकडं रवाना होणं अपेक्षित होतं. पण त्या अद्याप वाशिममध्येच आहेत. त्यांनी पुण्याला जाण्यासाठी कुठल्याही हालचाली केलेल्या नाहीत. त्यामुळं आता त्या पुणे पोलिसांसमोर जबाब नोंदवण्यासाठी हजर राहतात का? याबाबत साशंकता आहे.

दरम्यान, त्यांना जर प्रत्यक्ष पुण्यात हजर रहायचं नसेल किंवा हजर राहणं शक्य नसेल तर जबाब नोंदवण्यासाठी वेळ मागून घेण्याची किंवा व्हिडिओ कॉन्फरन्सिंगद्वारे पोलिसांसमोर जबाब नोंदवण्याची शक्यता आहे.