Pooja Khedkar : ''...तेव्हा पर्यावरणमंत्री आदित्य ठाकरे होते'', दिलीप खेडकरांवरुन होणाऱ्या आरोपांना रामदास कदमांचं उत्तर

Dilip Khedkar : पूजा खेडकर हे प्रकरण सध्या देशभर गाजत आहे. पूजाचं आयएएस कालावधीतलं प्रशिक्षण थांबवण्यात आलेलं असून यूपीएससीने तिच्यावर गुन्हा नोंद केला आहे. पूजामुळे तिच्या कुटुंबाचे जुने कारनामे उघड होऊ लागले आहेत. तिचे वडील दिलीप खेडकरवर अनेक प्रकरणांची चौकशी असताना रामदास कदम यांनी मंत्रिपदाचा दुरुपयोग करुन खेडकरला पोस्टिंग दिल्याचा आरोप तानाजी गंभीरे यांनी केला आहे.

प्रसिद्ध वकील तानाजी गंभीरे यांनी दिलीप खेडकर यांच्या बेहिशेबी मालमत्तेची एसीबीने चौकशी करावी, अशी लेखी मागणी राज्य शासनाकडे केली आहे. त्याचबरोबर वकील गंभीरे यांनी कोकणातील दोन मंत्र्यांची नावे घेऊन खेडकरच्या बदलीसाठी कोट्यवधी रुपये घेतल्याचे लेखी तक्रारीत म्हटले आहे. त्यावर शिवसेना नेते रामदास कदम यांनी उत्तर दिलं.

रामदास कदम म्हणाले की, दिलीप खेडकर आणि माझ्याविषयी प्रसार माध्यमातून ज्या बातम्या पसरत आहेत, त्या माझी बदनामी करणाऱ्या आहेत. माझ्याविरोधात कोणत्याही प्रकारचे पुरावे नसताना बातम्या पासरावयच्या हे चुकीचे आहे.

मी आमदार, मंत्री, विरोधी पक्षनेता राहिलो आहे, पण कधीही डाग लावून घेतलेला नाही. मुळात मंत्र्यांचा आणि बदलीचा काही संबंध येत नाही, हे सचिवांचे काम असते, असं रामदास कदम म्हणाले.

गंभीरे आणि संजय कदम यांनी आठ दिवसांच्या आत माफी मागावी, नाहीतर मानहानीचा दाव्याला सामोरे जावे, अशा इशारा रामदास कदम यांनी दिला. ते पुढे म्हणाले की, दिलीप खेडकरची बदली 2022 ला झाली तेव्हा पर्यावरण मंत्री आदित्य ठाकरे होते, मग हा प्रश्न त्यांनाच विचारायला हवा. यातून फक्त एकनाथ शिंदे यांच्या जवळ असलेल्या माणसांची बदनामी कशी होईल हेच बघितलं जातंय.