Ajit Pawar In Delhi: अजित पवार अर्थ खात्यासाठी आग्रही? प्रफुल पटेल स्पष्टच बोलले

Ajit Pawar In Delhi: राष्ट्रवादीतील बंडखोरीनंतर अजित पवार महाराष्ट्रातील शिवसेना-भाजप सरकारमध्ये सहभागी होऊन दहा दिवस उलटले आहेत. मात्र नवीन मंत्र्यांना खाते वाटपाचे काम प्रलंबित आहे. अजित पवार यांनी २ जुलै रोजी उपमुख्यमंत्री म्हणून शपथ घेतली. त्यांच्यासोबत राष्ट्रवादीच्या आठ नेत्यांनी मंत्रिपदाची शपथ घेतली, मात्र अद्याप खात्यांचे वाटप झालेले नाही.

मंत्रिमंडळ विस्तार आणि पोर्टफोलिओ वाटपाबाबत प्रदीर्घ बैठकांचा दौरा सुरू आहे. दरम्यान, अजित पवार बुधवारी (१२ जुलै) दिल्लीला गेले. भाजपच्या वरिष्ठ नेत्यांची दिल्लीत बैठक घेणार आहेत. अजित पवार यांना अर्थमंत्रालय हवे असल्याचे सूत्रांचे म्हणणे आहे.

दरम्यान प्रफुल्ल पटेल यांनी दिल्लीत माध्यमांशी संवाद साधला. ते म्हणाले, सरकारमध्ये सामील झाल्यापासून आमची आणि दिल्लीतीन नेत्यांची भेट नव्हती त्यामुळे औपचारीक भेट म्हणून आम्ही दिल्लीला आलो आहोत.

प्रफुल्ल पटेल म्हणाले, आमच्यात कुठलाही वाद नाही. काल रात्री मुख्यमंत्री एकनाथ शिंदे, उपमुख्यमंत्री देवेंद्र फडणवीस यांची बैठक झाली. त्यानंतर अजित पवार, माझी आणि सुनिल तटकरे यांची बैठक झाली. आमच्या गोष्टी क्लिअर झाल्या आहेत. खातेवाटपावर आज कोणतीही चर्चा झाली नाही.

आधीची खाती ही भाजप आणि शिवसेनेकडे आहेत. कुठलं खातं काढून आम्हाला द्यायचं नंतर त्या मंत्र्यांना कुठलं खाते द्यायचं याबाबत चर्चा सुरू आहे. ही प्रक्रिया सुरू आहे. मागील दोन दिवसांपासून यावर चर्चा सुरू आहे, असे पटेल म्हणाले.

अर्थखात्यावरुन कोणताही वाद नाही. उद्या किंवा परवा खातेवाटप झालेले दिसेल, अशी माहिती प्रफुल्ल पटेल यांनी दिली.