'संजय राऊत तुम्ही 'महाचमचा'; पंतप्रधानांची माफी मागावी'

शिवसेना खासदार संजय राऊत यांनी आज भाजपाचे चंद्रकांत पाटील यांच्या एका पंतप्रधान मोदींसंदर्भातील वक्तव्यावर सडकून टीका केली आहे. पंतप्रधान मोदी 22 तास काम करतात. उरलेले दोन तास झोपही पंतप्रधानांना येऊ नये यावर संशोधन सुरू आहे.' चमच्यांचे हे विधान ऐकून पंतप्रधान मोदींची (PM Modi) दोन तासांची झोपही उडाली असेल!, असा टोमणा राऊत यांनी लगावला आहे. मालिक तो महान है, बस चमचों से परेशान हैं, असेही ते म्हणाले आहेत. दरम्यान, आता त्यांच्या या विधानानंतर भाजपाकडून तिखट प्रतिक्रिया येत आहेत. भाजपाचे प्रसाद लाड (Prasad Lad) यांनी 'महाचमचा' संजय राऊत यांनी सबंध देशाची माफी मागावी, अशी मागणी केली आहे.

लाड यांनी यासंदर्भात ट्विट केलं आहे. यात ते म्हणतात, खासदार संजय राऊत यांनी आज माध्यमांशी बोलताना पंतप्रधान मोदींसह, महात्मा गांधी आणि पंडित नेहरु यांचाही अपमान केला आहे. त्यामुळे देशाचे राष्ट्रपिता महात्मा गांधी यांचा अपमान करणाऱ्या, 'महाचमचा' संजय राऊत यांनी सबंध देशाची माफी मागावी, असेही त्यांनी स्पष्ट केलं आहे.

काय म्हणाले आहेत प्रसाद लाड

खासदार संजय राऊत यांनी चमचेगिरीची भाषा करणे म्हणजे जगातील सर्वात मोठा विनोद आहे. जगविख्यात चमचा म्हणून महाविकास आघाडी सरकार स्थापन झाल्यापासून त्यांनी शरद पवार (Sharad Pawar) आणि मुख्यमंत्री उद्धव ठाकरेंची (Uddhav Thackeray) चमचेगिरी केली आहे. त्यामुळे राऊतांना असे बोलण्याचा काहीही अधिकार नाही. नरेंद्र मोदी किती तास काम करतात हे देश आणि जगाने मान्य केले आहे. परंतु तुमच्या व्यक्तीसाठी तुम्ही चमचेगिरी करता. पंतप्रधान किती वेळा आणि किती तास काम करतात हा संशोधनाचा विषय आहे. संजय राऊत तुम्ही महात्मा गांधींसह, नेहरुंनाही चमचे होते असे म्हणाला आहात. हा कॉंग्रेसचाच नव्हे तर देशाचा अपमान आहे. त्यामुळे तुम्ही महात्मा गांधी, पंडित नेहरू आणि पंतप्रधान नरेंद्र मोदी यांची माफी मागितली पाहिजे, अशी मागणी त्यांनी केली आहे.