मुंबई - नव्या दरबार हॉलचे राष्ट्रपतींच्या हस्ते उद्घाटन

मुंबई - राष्ट्रपती रामनाथ कोविंद हे चार दिवस महाराष्ट्र दौऱ्यावर आहेत. ते आज मुंबईत असून राजभवनात नव्या दरबार हॉलचे त्यांच्या हस्ते उद्घाटन झाले. राजभवन येथील नवीन कोनशिलेचे अनावरण राष्ट्रपतीच्या हस्ते करण्यात आले आहे. या कार्यक्रमाला मुख्यमंत्री उद्धव ठाकरे, उपमुख्यमंत्री अजित पवार, सार्वजनिक बांधकाम मंत्री अशोक चव्हाण, पर्यावरण मंत्री आदीत्य ठाकरे उपस्थित आहेत.

राजभवान जुन्या दरबार हॉलच्या जागीच नवीन दरबार हॉल बांधण्यात आला आहे. जुन्या दरबार हॉलच्या तुलनेत नव्या हॉलमध्ये जास्त आसनक्षमता आहे. जुन्या हॉलची हेरिटेज वैशिष्ठ्ये अबाधित ठेवून सभागॉहाला बाल्कनी आणि गॅलरी उभारण्यात आली आहे. २०१९ मध्ये सुरु झालेलं काम डिसेंबर २०२१ मध्ये पूर्ण झालं आहे.

राष्ट्रपती रामनाथ कोविंद हे सपत्निक गुरुवारी मुंबईत दाखल झाले. राज्यपाल भगतसिंह कोश्यारी आणि राजशिष्टाचार मंत्री आदित्य ठाकरे यांच्यासह वरिष्ठ अधिकारी त्यांच्या स्वागतासाठी उपस्थित होते. आज नव्या दरबार हॉलचे उद्घाटन झाल्यानंतर उद्या शनिवारी राष्ट्रपती रत्नागिरी दौऱ्यावर जाणार आहेत. आंबडवे इथे असलेल्या डॉक्टर बाबासाहेब आंबेडकर स्मारक आणि भारतरत्न डॉक्टर बाबासाहेब आंबेडकर विद्यामंदिरला ते भेट देणार आहेत.