पुण्यश्लोक अहिल्यादेवी होळकर सोलापूर विद्यापीठास २० वर्षे पूर्ण; यंदाचा जीवनगौरव पुरस्कार उद्योजक राम रेड्डी यांना जाहीर; ‘या’ कर्मचाऱ्यांसह शिक्षकांना व महाविद्यालयांनाही विशेष पुरस्कार

सोलापूर : पुण्यश्लोक अहिल्यादेवी होळकर सोलापूर विद्यापीठाचा यंदाचा प्रतिष्ठेचा व मानाचा जीवनगौरव पुरस्कार उद्योजक राम रेड्डी यांना जाहीर झाल्याची माहिती कुलगुरू डॉ. प्रकाश महानवर यांनी सोमवारी पत्रकार परिषदेत दिली. रोख ५१ हजार रुपये, स्मृतिचिन्ह, गौरवपत्र, शाल, श्रीफळ असे या पुरस्काराचे स्वरूप आहे.

गुरुवारी (ता. १) विद्यापीठाचा २० वा वर्धापन दिन साजरा केला जाणार आहे. सकाळी आठ वाजता कुलगुरू डॉ. महानवर यांच्या हस्ते ध्वजारोहण होईल. त्यानंतर दहा वाजता विद्यापीठाच्या मुख्य सभागृहात पुरस्कार वितरण सोहळा पार पडेल. या समारंभास डॉ. बाबासाहेब आंबेडकर मराठवाडा विद्यापीठाचे कुलगुरू प्रा. विजय फुलारी यांची प्रमुख उपस्थिती असणार आहे. यावेळी सोलापूर महापालिकेच्या आयुक्त शीतल तेली-उगले, प्र-कुलगुरु प्रा. लक्ष्मीकांत दामा, कुलसचिव योगिनी घारे हेही उपस्थित असणार आहेत. विद्यापीठाच्या विविध पुरस्कारांसाठी प्रस्ताव मागवून तज्ज्ञ समितीकडून पुरस्कर्त्यांची निवड केली आहे. पत्रकार परिषदेसाठी प्र-कुलगुरू प्रा. लक्ष्मीकांत दामा, कुलसचिव योगिनी घारे, परीक्षा संचालक डॉ. श्रीकांत अंधारे, जनसंपर्क अधिकारी राहुल वंजारे, डॉ. अंबादास भास्के आदी उपस्थित होते.

यंदा पुरस्कार मिळालेले...

• उत्कृष्ट शैक्षणिक संस्था पुरस्कार : सावित्रीबाई फुले शिक्षण प्रसारक मंडळ (कमलापूर, ता. सांगोला)

• उत्कृष्ट महाविद्यालय पुरस्कार : बाबूराव पाटील कला व विज्ञान महाविद्यालय (अनगर, ता. मोहोळ)

• उत्कृष्ट प्राचार्य पुरस्कार : प्राचार्य डॉ. चंद्रकांत सूर्यवंशी (बाबूराव पाटील कला व विज्ञान महाविद्यालय, अनगर)

• उत्कृष्ट शिक्षक पुरस्कार (विद्यापीठ) : डॉ. बाळकृष्ण लोखंडे (संचालक, पदार्थविज्ञान संकुल), डॉ. गौतम कांबळे (संचालक, सामाजिकशास्त्रे संकुल)

• उत्कृष्ट शिक्षक पुरस्कार (महाविद्यालय) : डॉ. वीरभद्र दंडे (डी. बी. एफ. दयानंद कॉलेज ऑफ आर्ट्स अँड सायन्स, सोलापूर), डॉ. आयेशा रंगरेज (कस्तुरबाई शिक्षणशास्त्र महाविद्यालय, सोलापूर)

• उत्कृष्ट शिक्षकेतर अधिकारी पुरस्कार (वर्ग एक व दोन विद्यापीठ) : आनंदराव पवार (सहायक कुलसचिव)

• उत्कृष्ट शिक्षकेतर कर्मचारी पुरस्कार (वर्ग तीन विद्यापीठ) : रूपाली हुंडेकरी (वरिष्ठ लिपिक)

• उत्कृष्ट शिक्षकेतर कर्मचारी पुरस्कार (वर्ग चार विद्यापीठ): नामदेव सोनकांबळे (वाहनचालक)

• उत्कृष्ट शिक्षकेतर कर्मचारी पुरस्कार (लिपिक संवर्गीय महाविद्यालय) : कैलास सातव (मुख्य लिपिक, भारत महाविद्यालय, जेऊर)

• उत्कृष्ट शिक्षकेतर कर्मचारी पुरस्कार (चतुर्थश्रेणी कर्मचारी महाविद्यालय) : अभिजित जाधव (ग्रंथालय परिचर, कर्मवीर भाऊराव पाटील महाविद्यालय, पंढरपूर)