Koyna Dam Update : कोयना धरण क्षेत्रात पावसाचा जोर कायम; 'इतके' टक्के भरले धरण, महाबळेश्‍वरातही संततधार

पाटण : कोयना धरण (Koyna Dam) पाणलोट क्षेत्रात संततधार पाऊस पडत आहे. काल दिवसभर पावसाचा जोर कायम होता. त्यामुळे कोयना धरण २५ टक्के भरले आहे.

कोयनानगरला पावसाचा जोर कमी असला तरी नवजा व महाबळेश्‍वर (Mahabaleshwar) परिसरात संततधार सुरू आहे. त्यामुळे गेल्या २४ तासांत कोयना धरणाच्या पाणीसाठ्यात एक टीएमसी पाणीसाठा वाढला आहे.

रात्रीपासून कोयना धरण पाणलोट क्षेत्रात संततधार पावसाच्या सरी पडत होत्या. काल दिवसभर तीच स्थिती होती. गेल्या २४ तासांत कोयनानगर येथे ६८ (१०९४) मिलिमीटर, नवजाला ९७ (१५८६) मिलिमीटर आणि महाबळेश्‍वरला ९१ (१५७१) मिलिमीटर पावसाची नोंद झाली आहे.

जलाशयात प्रतिसेकंद पाच हजार क्युसेक पाण्याची आवक वाढली असून, आज प्रतिसेकंद १२ हजार ४७६ क्युसेक नोंदली गेली आहे. २४ तासांत एक टीएमसीने पाणीसाठा वाढला आहे. एकूण पाणीसाठा २६.१६ टीएमसी झाला असून, पाणीपातळी २०६९ फूट झाली आहे.