Maharashtra Rain Update : मध्य महाराष्ट्रात पावसाचा जोर वाढणार

पुणे : मध्य महाराष्ट्रात पुणे जिल्ह्यासह साताऱ्यातही घाटमाथ्यावर शनिवारी (ता. ३) तुरळक ठिकाणी अत्यंत जोरदार पावसाचा अंदाज आहे. या जिल्ह्यांमधील घाट विभागांत शनिवारी २४ तासांत तब्बल २०० मिलिमीटर किंवा त्यापेक्षा जास्त पाऊस पडण्याची शक्यता आहे, असा इशारा हवामान विभागाने दिला आहे.

याशिवाय या भागांत ‘रेड अलर्ट’ दिला आहे. मध्य महाराष्ट्रात पुणे आणि सातारा जिल्ह्यातील घाटमाथ्यावर अत्यंत जोरदार पाऊस पडेल, असा अंदाज असून घाट विभागात ‘रेड अलर्ट’ दिला आहे.

पुण्यात आज, उद्या मध्यम पाऊस :

पुणे आणि परिसरात शनिवारी (ता. ३) आणि रविवारी (ता. ४) आकाश संपूर्णतः ढगाळ राहून मध्यम पावसाच्या काही सरी पडण्याची शक्यता आहे. घाट विभागात तुरळक ठिकाणी खूप जोरदार ते अत्यंत जोरदार पाऊस होईल.

सोमवारपासून (ता. ५) पावसाचा जोर काहीसा कमी होण्याची शक्यता आहे. पुढील आठवड्यापासून पुणे परिसरात आकाश सामन्यत: ढगाळ राहून हलक्या ते मध्यम पावसाच्या सरी पडतील. घाट विभागात तुरळक ठिकाणी जोरदार पाऊस पडेल, असा अंदाज हवामान विभागाने दिला आहे.