Rain Update : पश्चिम महाराष्ट्रात पावसाचं दमदार कमबॅक; कोयना धरण क्षेत्रात जोरदार पाऊस, महाबळेश्वरला 88 मिलिमीटर पावसाची नोंद

पाटण : सलग दुसऱ्या दिवशी कोयना धरण (Koyna Dam) पाणलोट क्षेत्रात पावसाचा (Rain Update) जोर कायम आहे. त्यामुळे गेल्या २४ तासांत धरण पाणलोट क्षेत्रातील कोयनानगर येथे ६३ मिलिमीटर, नवजाला ९२ मिलिमीटर आणि महाबळेश्वरला (Mahabaleshwar) ८८ मिलिमीटर पावसाची नोंद झाली आहे.

धरणाचा एकूण पाणीसाठा ८५.९६ टीएमसी झाला असून, पाणीपातळी २१४७.१० फूट झाली आहे. जलाशयात प्रतिसेकंद सहा हजार ८१३ क्युसेक पाण्याची आवक होत असून, पायथा वीजगृहातील एका जनित्राद्वारे एक हजार ५० क्युसेक पाण्याचा विसर्ग कोयना नदीपात्रात (Koyna River) करण्यात येत आहे.

कोयना धरण पाणलोट क्षेत्रात संततधार पाऊस पडत आहे. सलग दोन दिवस पावसाने दमदार हजेरी लावली असल्याने संथगतीने पाणीसाठ्यात वाढ होते आहे. तालुक्याच्या पूर्व भागात रात्री दमदार पावसाच्या सरी पडत होत्या. सकाळी थोडी पावसाने उसंत घेतली होती.

मात्र, पुन्हा दुपारी दमदार पावसाच्या सरी येऊ लागल्या. सलग दोन दिवस संततधार पडलेल्या पावसामुळे शेतकरी वर्गात समाधानाचे वातावरण निर्माण झाले आहे. मात्र धरण पूर्ण क्षमतेने भरण्यासाठी अजून २० टीएमसी पाण्याची गरज असून, कोयना धरण पाणलोट क्षेत्रात सरासरी एक हजार मिलिमीटर पाऊस पडणे गरजेचे आहे.