संभाजीराजेंचा पत्ता कट? संजय पवारांच्या नावावर शिवसेनेचं शिक्कामोर्तब

सध्या महाराष्ट्राच्या राजकारणात राज्यसभेच्या निवडणुकीचे वारे वाहत आहे. सहाव्या जागेसाठी आपल्या भूमिकेवर शिवसेना ठाम असून संभाजीराजे छत्रपतींना सेनेने उमेदवारीसाठी पक्ष प्रवेशाची अट घातली होती. मात्र आता संभाजीराजेंचा पत्ता कट करुन शिवसेनेकडून राज्यसभेसाठी उमेदवार फायनल करण्यात आला आहे. शिवसेनेने कोल्हापुरातले शिवसेना जिल्हा प्रमुख संजय पवार यांच्या नावासमोर शिक्कामोर्तब केला आहे. थोड्याच वेळात या नावाची अधिकृत घोषणा केली जाण्याची शक्यता आहे.

दरम्यान, शिवसेनेच्या ऑफरकडे संभाजीराजेंनी पाठ फिरवली होती. पण आता कोल्हापुरातल्या शिवसेना नेत्याचा विचार केला जात असल्याने संभाजीराजेंनी लवकर निर्णय घ्यावा लागणार असल्याचे बोलले जात होते. यातच संभाजीराजेंनी उमेदवारी फेटाळल्यानंतर उद्धव ठाकरे शिवसेना नेत्यांनाच उमेदवारी देण्यावर ठाम आहेत. शिवेसनेन संभाजीराजेंना निर्णय घेण्यासाठी वेळ दिला होता. आता शिवसेनेनं संभाजीराजे यांचा पत्ता थेट करुन कोल्हापुरातील शिवसेना जिल्हाप्रमुख संजय पवार यांना उमेदवारी देण्याचं निश्चित केलं आहे. यानंतर आता पुन्हा एकदा राजकीय वातावरण तापण्याची शक्यता वर्तवण्यात येत आहे.

राज्यसभेसाठी शिवसेना कोणाच्या नावाची घोषणा करणार याकडे सर्वांचं लक्ष लागून राहिलं होतं. यात संजय पवार यांच्या नावाचीही चर्चा होती. दरम्यान, माझ्या नावाची चर्चा असल्याचं मला माध्यमांकडूनच कळालं. या यादीमध्ये आढळराव पाटील, उर्मिला मातोंडकर, चंद्रकांत खैरे यांच्या नावाचीही चर्चा आहे. पण मला संधी मिळाली तर नक्की चांगलं काम करून दाखवू, अशी प्रतिक्रिया त्यांनी पुण्यात बोलताना दिली आहे. राज्यसभेसाठी माझ्या नावाची चर्चा आहे. हे मला माध्यमांतूनच समजलं. पण याबाबत अद्याप वरिष्ठ नेत्यांकडून काहीही सिग्नल नाही. कोणाचाही फोन आलेला नाही, असंही संजय पवार यांनी स्पष्ट केलं आहे.