'शिवसेना आघाडीतून बाहेर पडेल अन् भाजपासोबत राज्यात सत्तेत येईल'

सांगली : पुढच्या वर्षी शिवसेना महाविकास आघाडीतून बाहेर पडेल आणि भाजपासोबत राज्यात सत्तेत येईल, असे भाकीत केंद्रीय सामाजिक न्याय राज्यमंत्री रामदास आठवले यांनी केले. केंद्रीय मंत्री नारायण राणे यांच्या विधानाला दुजोरा देत राज्यातील महाविकास आघाडीचे सरकार लवकरच जाईल, असा विश्वासही त्यांनी व्यक्त केला.

केंद्रीय सामाजिक न्याय राज्यमंत्री रामदास आठवले सांगली दौऱ्यावर आले होते. त्यावेळी प्रसारमाध्यमांशी संवाद साधला. केंद्रीय मंत्री नारायण राणे यांनी मार्चमध्ये महा विकास आघाडीचे सरकार जाईल असे विधान केले होते यावर बोलतना मंत्री आठवले म्हणाले, शिवसेना आणि भाजपा या आधी सत्तेत एकत्र होती. आता शिवसेना महविकास आघाडीमध्ये आहे. मात्र या सरकारमध्ये अनेक विषयांवरून प्रवाद आहेत. अनेकांची चौकशी सुरू आहे. त्यामुळे शिवसेनेने सत्तेतून बाहेर पडावे असे माझे आवाहन आहे. लवकरच शिवसेना आघाडीतून बाहेर पडेल. त्यानंतर भाजपा सोबत शिवसेना येऊन राज्यात नवी सत्ता येऊ शकते. पुढील वर्षी मार्च-एप्रिलमध्ये राज्यात नवी सत्ता येऊ शकते, त्यामुळे नारायण राणे यांचे जे विधान आहे, ते बरोबर असू शकते.

ते म्हणाले, आतापर्यंत केंद्र सरकारच्या वतीने कोरोनाच्या पार्श्वभूमीवर योग्य ती खबरदारी घेण्यात आली आहे, भविष्यातही अशीच काळजी घेतली जाईल असे ते म्हणाले. गेल्या वेळी गो कोरोना गो असे म्हटल्याची आठवण करत यावेळी त्यांनी "नो कोरोनाचा" नवा नारा दिला. सोमवारपासून संसदीय अधिवेशन पार पडणार आहे, या अधिवेशनामध्ये विरोधकांनी गोंधळ घालू नये, असे आवाहन त्यांनी केले.

राकेश टिकेतांवर कारवाई करा

शेतकऱ्यांची मागणी असणारे तीनही कृषी कायदे केंद्र सरकारने मागे घेतले आहेत. तरीही सुरू असलेले आंदोलन थांबले पाहिजे. अन्यथा शेतकरी नेते राकेश टिकेत यांच्यावर कारवाई करावी, असे ते म्हणाले.