डिसले गुरुजींना डॉ. ए पी जे अब्दुल कलाम प्राईड ऑफ इंडिया पुरस्कार जाहीर

Ranjitsinh Disale Award : बार्शी येथील जागतिक 'ग्लोबल टीचर' पुरस्कार मिळवणारे पहिले भारतीय शिक्षक रणजितसिंह डिसले गुरुजींच्या शिरपेचात आणखी एक मानाचा तुरा रोवला गेला आहे. कारण डिसले गुरुजींना डॉ. ए पी जे अब्दुल कलाम यांच्या परिवाराकडून देण्यात येणारा डॉ. ए पी जे अब्दुल कलाम प्राईड ऑफ इंडिया हा पुरस्कार देऊन गौरविण्यात येणार आहे. तंत्रज्ञानातील अभिनव प्रयोगांमुळे डिसले गुरूजींना या पुरस्काराने गौरविण्यात येणार आहे. रणजितसिंह डिसले गुरूजींनी ट्विट करत ही माहिती दिली आहे.

पुरस्काबाबत डिसले यांनी केलेल्या ट्वीटमध्ये ते म्हणतात की, ज्यांनी आमच्या पिढीला मोठी स्वप्न पहायला शिकवलं अशा आदरणीय डॉ. ए पी जे अब्दुल कलाम यांच्या परिवाराकडून दिला जाणारा पुरस्कार स्वीकारताना अतिशय आनंद होतोय. या पुरस्काराने माझ्यावरील जबाबदारी वाढवली आहे. डॉ. ए पी जे अब्दुल कलाम यांच्या परिवाराकडून डॉ. ए पी जे अब्दुल कलाम प्राईड ऑफ इंडिया हा पुरस्कार देण्यात येतो. क्रीडा, आरोग्य, शिक्षण, विज्ञाम आणि तंत्रज्ञान, महिला सबलीकरण, संगीत क्षेत्रातील तसेच कोरोना काळात महत्त्वाची जबाबदारी बजवणाऱ्या वॉरियर्सला हा पुरस्कार देण्यात येतो.

दरम्यान, ग्लोबल टीचर पुरस्कारानंतर रणजितसिंह डिसले यांना अमेरिकन सरकारची प्रतिष्ठित फुलब्राईट स्कॉलरशिप जाहीर झाली असून, 8 ऑगस्टला डिसले गुरूजी यासाठी अमेरिकेला रवाना होणार आहे. या स्कॉलरशिप अंतर्गत अभ्यासाठी डिसले गुरुजींना सहा महिने अमेरिकेत जाऊन अभ्यास करावा लागणार आहे.