RSS नं केलं हैदराबादचं नामांतर; ट्विटमध्ये दिलं नवं नाव

राष्ट्रीय स्वयंसेवक संघाकडून (Rashtriya Swayamsevak Sangh) हैदराबादच्या (Hyderabad) नामांतराचा मुद्दा पुन्हा एका उपस्थित करण्यात आलाय. संघाच्या ट्विटमध्ये हैदराबादचा उल्लेख ‘भाग्यनगर’ (Bhagyanagar) असा करण्यात आला असून भाजप आणि संघाच्या अजेंड्यावर हैदराबादच्या नामांतराचा विषय पुन्हा चर्चिला जात आहे. राष्ट्रीय स्वयंसेवक संघ विविध क्षेत्रात काम करणाऱ्या विविध संघटनांच्या प्रमुख पदाधिकाऱ्यांची समन्वय बैठक पुढील महिन्यात म्हणजे, 5 ते 7 जानेवारी 2022 या कालावधीत भाग्यनगर (हैदराबाद), तेलंगणा (Telangana) येथे आयोजित करणार आहे. ही अखिल भारतीय स्तरावरील सर्वसमावेशक समन्वय बैठक वर्षातून एकदा घेतली जाते.

या बैठकीला सरसंघचालक डॉ. मोहन भागवत (Mohan Bhagwat), सरकार्यवाह दत्तात्रेय होसबळे यांच्यासह संघाचे प्रमुख पदाधिकारी उपस्थित राहणार आहेत. या शिवाय भारतीय मजदूर संघाचे हिरण्यमय पंड्या, बी. सुरेंद्रन, विश्व हिंदू परिषदेचे आलोक कुमार, मिलिंद परांदे, अखिल भारतीय विद्यार्थी परिषदेचे आशिष चौहान, श्रीमती निधी त्रिपाठी, भाजपचे राष्ट्रीय अध्यक्ष जेपी नड्डा (J. P. Nadda), बी. एल. संतोष, भारतीय किसान संघाचे दिनेश कुलकर्णी, रामकृष्ण राव, विद्या भारतीचे जी. एम. काशीपती, राष्ट्र सेविका समितीचे सुश्री अन्नदानम सिताक्का, रामचंद्र खराडी, वनवासी कल्याण आश्रमाचे अतुल जोग यांच्यासह 36 संस्थांचे अधिकारी सहभागी होणार असल्याचे राष्ट्रीय स्वयंसेवक संघाचे प्रचार प्रमुख सुनील आंबेकर यांनी सांगितले. या बैठकीत पर्यावरण, कौटुंबिक प्रबोधन, सामाजिक समरसता या विषयांवर चर्चा होणार आहे. मात्र, या सगळ्यात राष्ट्रीय स्वयंसेवक संघाकडून हैदराबादच्या नामांतराचा मुद्दा पुन्हा एकदा उपस्थित केला असून भाजप यावरती कोणती प्रतिक्रिया देणार याकडं आता लक्ष असणार आहे.