Sharad Pawar : शरद पवारांबद्दल सदाभाऊंचं आणखी एक वादग्रस्त वक्तव्य; म्हणाले, 'आता त्यांना गोळ्या घालणार का?'

सातारा : माझ्याकडून अनवधानाने ‘सैतान’ शब्द वापरला गेला आहे. गावगाड्यांमध्ये सैतान हा शब्द सहज वापरला जातो. माझी गावगाड्यातील भाषा इंडियातील लोकांना प्रस्थापितांना कडवट लागली.

मला सेनापती गावगाड्याकडे येत आहे, त्याला रोखूया असे म्हणायचे होते, असे स्पष्टीकरण रयत क्रांती संघटनेचे अध्यक्ष सदाभाऊ खोत यांनी साताऱ्यात पत्रकारांशी बोलताना दिले. माजी मंत्री सदाभाऊ खोत यांनी शरद पवार (Sharad Pawar) यांच्यावर ‘सैतान’ हा शब्द प्रयोग केल्यानंतर त्यांच्यावर महाविकास आघाडीतून टीकेची झोड उठली.

यावर सदाभाऊ खोत (Sadabhau Khot) यांनी साताऱ्यात पत्रकारांपुढे आपली भूमिका मांडली. माझ्याकडून अनवधानाने ‘सैतान’ हा शब्द गेला आहे. शरद पवार यांनीदेखील समृद्धी महामार्गाच्या अपघात झाला, त्यावेळेस काही लोक ‘देवेंद्रवासी’ झाले, असा शब्दप्रयोग केला होता; पण त्यांना हा शब्दप्रयोग करायचा नसावा.

परंतु, शरद पवार यांनी तो अनवधानाने केला होता. म्हणून तुम्ही आता गोळ्या घालणार का? कारण गुण्यागोविंदाने शिवसेना-भाजप सरकार नांदत असताना यामध्ये तोडाफोडी कोणी केली? याचा इतिहास तपासावा लागेल, असा खुलासा सदाभाऊ खोत यांनी केला.