भर मिटिंग मध्ये निवृत्त जवानाच्या पत्नीचा विनयभंग, डोंबिवली मध्ये घडली धक्कादायक घटना

Dombivali news: कल्याण डोंबिवलीमध्ये महिलांवरील अत्याचाराच्या घटना वाढत आहे. अल्पवयीन मुलीवर अतिप्रसंग करण्याचा प्रयत्न, महिलेवर 15 जणांच्या टोळक्याने केलेला हल्ला या घटना ताज्या असतानाच आणखी एक घटना डोंबिवलीत घडली आहे.

सोसायटीच्या बैठकीत सीआरपीएफ दलातील निवृत्त जवानाच्या पत्नीचा विनयभंग करण्यात आल्याचा प्रकार उघडकीस आला आहे. याप्रकरणी मानपाडा पोलीस ठाण्यात महेश ठोंबरे याच्या विरोधात गुन्हा दाखल करण्यात आला आहे.

महेश हा एका राजकीय पक्षाशी संबंधित असल्याने अद्याप पोलिसांनी त्याला अटक केली नसल्याचे बोलले जात आहे. या घटनेवरून कल्याण डोंबिवली मध्ये महिला सुरक्षित नसल्याचे बोलले जात आहे.

डोंबिवली पूर्वेतील काऊन तळोजा परिसरात ही घटना शनिवारी दुपारी घडली आहे. शनिवारी दुपारी

सोसायटीच्या बैठकीचे आयोजन करण्यात आले होते. या बैठकीत महेश यांचे एका महिलेसोबत भांडण झाले. या भांडणात निवृत्त जवान यांच्या पत्नीने त्या महिलेची बाजू घेतली. याचा राग आल्याने महेश यांनी पीडित महिलेशी स्त्री मनास लज्जा येईल अशा अर्वाच्य भाषेत बोलत हातवारे केले. (Latest marathi News)

या बैठकीत काही नागरिकांनी महेश याला संबंधित महिलेची माफी मागण्यास सांगितले. मात्र त्याने माफी न मागता पुन्हा शिवीगाळ केला असल्याचे महिलेने तक्रारीत म्हटले आहे.

याप्रकरणी रविवारी रात्री उशिरा मानपाडा पोलीस ठाण्यात महेश याच्या विरोधात तक्रार दाखल करण्यात आली. दाखल तक्रारीवरून पोलिसांनी विनयभंगचा गुन्हा दाखल करत तपास सुरू केला आहे. महेश हा एका राजकीय पक्षाशी संबंधित असल्याने त्याच्यावर अद्याप कारवाई केली गेली नसल्याचे बोलले जात आहे. (Latest marathi News)

मात्र, सुशिक्षितांच्या डोंबिवलीत भारतीय निवृत्त सैनिकाच्या महिलेचा विनयभंग झाल्याने सध्या एकच खळबळ उडाली आहे.