Rohit Pawar : "भाजपच्या काही लोकांनी जसं राजकारण केलं तसं..." ; वीज कर्मचाऱ्यांच्या प्रश्नावर रोहित पवारांची प्रतिक्रिया

Rohit Pawar : एसटी कर्मचाऱ्यांच्या संपानंतर आता राज्यातील महावितरणच्या कर्मचाऱ्यांनी संप पुकारला आहे. महावितरण कंपनीच्या खासगीकरणाच्या विरोधात महावितरणच्या कर्मचारी, अभियंता, अधिकारी कृती समितीव्दारे ३ दिवसांचा राज्यव्यापी संप केला आहे. त्यामुळे राज्यातील बऱ्याच भागातील बत्ती गूल झाली आहे. सरकार हा संप मोडित काढण्याच्या तयारीत आहे. संपावर गेल्यास थेट मेस्मा कायद्याअंतर्गत (Mesma Act) कारवाई होणार आहे, असे आदेश सरकारने दिली आहेत. दरम्यान राष्ट्रवादी काँग्रेसचे आमदार रोहित पवार यांनी उपमुख्यमंत्री देवेंद्र फडणवीस यांना विनंती केली आहे. (Rohit Pawar reaction on electricity worker strike)

"वीज कर्मचाऱ्यांच्या संपामुळं ग्रामीण आणि शहरी भागातील लोकांनाही त्रास सहन करावा लागतोय. एसटी कर्मचाऱ्यांच्या संपाच्या वेळी भाजपच्या काही लोकांनी जसं राजकारण केलं तसं वीज कर्मचाऱ्यांच्या प्रश्नावर कुणीही राजकारण न करता समोपचाराने हा प्रश्न मार्गी लावावा," अशी विनंती रोहित पवार यांनी केली आहे.

महावितरणच्या कर्मचाऱ्यांच्या संपामुळे राज्यभरात नागरिकांना त्रास सहन करावा लागत आहे. सरकारने कंत्रांटी कर्मचाऱ्यांद्वारे पर्यायी व्यवस्था केली. मात्र सर्व राज्यात ही व्यवस्था राबवण्यात आली नाही. वीजपुरवठ्याच्या परिस्थितीवर लक्ष ठेवण्यासाठी मुंबई येथील मुख्य कार्यालयासह सर्व परिमंडल व मंडल कार्यालयाच्या ठिकाणी संनियंत्रण कक्ष सुरू करण्यात आली आहे. हे नियंत्रण कक्ष २४ तास कार्यरत राहणार आहे.