'सावित्रीमाईवर शेण फेकणारे अन् हिजाबच्या ‌निमीत्तानं गोंधळ घालणारे एकच'

मागील दोन ते तीन दिवसांपासून हिजाब (Hijab) या विषयावरून कर्नाटकसह (Karnataka Government) देशातील वातावरण तापलं आहे. याप्रकरणी सत्ताधारी भाजप (BJP) आणि काँग्रेस पक्ष (Congress Party) आमनेसामने आहेत. दरम्यान, यावर अनेक उलट-सुलट प्रतिक्रिया येत आहेत. काही राजकीय नेत्यांनी या वादात उडी घेत सुरु असलेल्या घटनांवर टीका केली आहे. दरम्यान, आत रुपाली पाटील ठोंबरे यांनीही ट्वीट करुन भाजपावर निशाणा साधला आहे.

यात त्या म्हणतात, सावित्रीमाई फुले व फातिमा शेख यांच्या अंगावर शेण फेकणारे व हिजाबचं ‌निमीत्त करून‌‌ महिला शिक्षणात अडथळे आणनारे एकाच विचारसरणीचे लोक आहेत. जाती-पात आणि धर्माच्या भिंती तोडून महिला सन्मानासाठी सर्व धर्माचे लोक उभा राहत आहे. हा माझा खरा भारत आहे, अशी प्रतिक्रिया त्यांनी दिली आहे. आता रुपाली ठोंबरे पाटील (Rupili Patil-Thombare ) यांच्या या टीकेनंतर नव्या वादाला तोंड फुटणार का याची चर्चा राजकीय वर्तुळात सुरु आहे.

काय आहे ही घटना

मंगळवारी कर्नाटकातील उडुपी जिल्ह्यातील मणिपाल येथील महात्मा गांधी मेमोरियल कॉलेजमध्ये (Mahatma Gandhi Memorial College) भगवी शाल आणि हिजाब घातलेल्या विद्यार्थिनींच्या दोन गटांनी एकमेकांच्या विरोधात घोषणा दिल्यानं तणाव वाढला. सोशल मीडियावर व्हायरल झालेल्या एका व्हिडिओत मुलांचा एक गट मंड्यामध्ये हिजाब परिधान केलेल्या मुलीसोबत गैरवर्तन करताना दिसत होते. मात्र, सोशल मीडियावर या मुलीच्या बाजूनं समर्थनाचा वर्षाव झाला आहे. हिजाब (Hijab) घालण्याच्या मागणीसाठी आपला विरोध सुरू ठेवण्याचा आग्रह धरणाऱ्या मुलीनं सांगितलं, की तिला शिक्षकांचा पाठिंबा आहे. आता या घटनेमुळे काही काळासाठी देशातील वातावरण पुन्हा बिघडले आहे.