![Sakal Premier Award](http://media.assettype.com/esakal%2F2024-07%2Ff22313e7-0183-4553-9780-ef661b6930b5%2Fesakal_2024-06_ff49287d-2db0-4035-8cd8-7ecd022978cf_banner__99_.avif?rect=0%2C0%2C1200%2C675&w=480&auto=format%2Ccompress&fit=max)
मुंबई : मनोरंजनसृष्टीतील कलाकारांच्या पाठीवर कौतुकाची थाप देतानाच एकापेक्षा एक सरस कलाकारांचे नृत्याविष्कार, रॅपर सौरभ गाडगीळचे मराठी रॅप आणि पहिला इंडियन आयडॉल अभिजित सावंतच्या सुरेल मैफलीचा आनंद आज, रविवारी (ता. २१) अनुभवता येणार आहे. निमित्त आहे ‘सकाळ प्रीमियर चित्रपट पुरस्कार सोहळ्या’चे. विविध क्षेत्रातील मान्यवरांच्या उपस्थितीत रंगलेल्या या सोहळ्याचे सन मराठी वाहिनीवर रात्री आठ वाजता प्रसारण होणार आहे.
अभिनेत्री सोनाली कुलकर्णी, प्राजक्ता माळी आणि माधुरी पवार यांचा दिलखेचक नृत्याविष्कार, शिव ठाकरेचा दमदार परफाॅर्मन्स, रॅपर सौरभ अभ्यंकरचे मराठी रॅप आणि ‘इंडियन आयडॉल’फेम गायक अभिजित सावंतची सुरेल गीतांच्या मैफलीचा आनंद घेता येणार आहे.
मनोरंजनसृष्टीतील कलाकारांच्या कलागुणांचा गौरव करणारा ‘सकाळ प्रीमियर पुरस्कार सोहळा’ ठाण्यातील डॉ. काशिनाथ घाणेकर नाट्यगृहात मोठ्या थाटामाटात पार पडला. पीएनजी ज्वेलर्स लि. या सोहळ्याचे मुख्य प्रायोजक आहेत.
नवोदित कलाकार भाग्यम जैन, अस्मिता देशमुख व संचित चौधरी यांनीही सोहळ्यात आपल्या परफॉर्मन्सने उपस्थितांची वाहवा मिळविली. अभिनेता पुष्कर श्रोत्री आणि सारंग साठ्ये यांच्या खुमासदार आणि तितक्याच नेटक्या सूत्रसंचालनाने सोहळ्याला खऱ्या अर्थाने रंगत आणली.
कान्स चित्रपट महोत्सवात भारतीयांची मान अभिमानाने उंचावणाऱ्या अभिनेत्री छाया कदम यांचाही विशेष गौरव सोहळ्यात करण्यात आला. ज्येष्ठ अभिनेते, निर्माते व दिग्दर्शक महेश कोठारे यांना चित्रपटसृष्टीतील अमूल्य योगदानाबद्दल विशेष पुरस्कार देऊन गौरविण्यात आले.
ग्लॅमरस अभिनेत्री वर्षा उसगावकरलाही चित्रपटसृष्टीतील उल्लेखनीय कामगिरीबद्दल सन्मानित करण्यात आले.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.