'बाळासाहेब ठाकरे एक विचार आहे कुणाचीही खाजगी मालमत्ता नाही'

एकनाथ शिंदेंसह शिवसेना आमदारांच्या बंडाचा आजचा पाचवा दिवस आहे. या पाच दिवसांच्या कालावधीत अनेक घडामोडी वेगाने घडल्या आहेत. दरम्यान, गुवाहाटीला जाणाऱ्या मंत्र्यांचं मंत्रीपद आता धोक्यात आलं असून ते जाण्याचीही शक्यता आहे, असं वक्तव्य खासदार संजय राऊत यांनी केलं आहे. दरम्यान, बाळासाहेब ठाकेर आणि शिवसेना हे नाव इतर कोणालाही वापरता येणार नाही, असा आक्रमक पवित्रा शिवसेनेनं घेतला आहे. त्यामुळे शिंदे गटाला आता हे नाव वापरता येणार नाही. (MNS Latest political news)

शिवसेनेच्या या भूमिकेवरून आता मनसेने शिवसेनेला टोला लगावला आहे. हिंदुहृदयसम्राट बाळासाहेब ठाकरे हा एक विचार आहे. आणि हा विचार कोणत्याही पक्षाची किंव्हा व्यक्तीची खाजगी मालमत्ता असू शकत नाही, असा त्यांनी खडसावून सांगितलं आहे. पुढे ते म्हणतात की, जेव्हा महापौर बंगल्यात बाळासाहेब ठाकरेंचं स्मारक करायचं होतं तेव्हा बाळासाहेब पूर्ण हिंदुस्थानचे होते. आता म्हणता फक्त तुमचेच अस कसं?, असा सवालही देशपांडे यांनी केला आहे.

दरम्यान, सध्या सुरु असलेल्या राजकीय घडामोडींनंतर शरद पवार यांची संजय राऊतांनी भेट घेतली. त्यानंतर शरद पवारांचीही या प्रकरणात एन्ट्री झाल्याचं पाहायला मिळालं आहे. शिवसेना आता आमदारांविरोधात आक्रमक झाल्याचं दिसून येत आहे. या आमदारांवर कारवाई करण्याची सेनेची मागणी जोर धरु लागली आहे. १६ आमदारांच्या निलंबनाची मागणी केली जात आहे. त्यामुळं शिवसेनेत पदावर कोण राहतं, मंत्रीपदावर कोण राहील हे आज संध्याकाळपर्यंत कळणार आहे, असंही राऊत म्हणाले आहेत.