Sanjay Raut : ..तेव्हापासून महाराष्ट्र जातीपातीत वाटला गेला ; राऊतांचा खळबळजनक दावा !

Sanjay Raut : ‘देवेंद्र फडणवीस राज्याचे मुख्यमंत्री झाल्यापासून महाराष्ट्र जातीपातीत वाटला गेला,’’ असा गंभीर आरोप ठाकरे गटाचे खासदार संजय राऊत यांनी बुधवारी प्रसारमाध्यमांशी बोलताना केला.

सातारा जिल्ह्यातील खटाव तालुक्यात धार्मिक मुद्द्यांवरून दोन समाजांत संघर्ष झाला. राज्यात विविध ठिकाणी सामाजिक अशांतता आहे. यावरून राऊत यांनी भाजपवर निशाणा साधला. महाराष्ट्रातील वातावरण असे कधीच नव्हते.

अस्थिर आणि असुरक्षित जातीपातींमध्ये वाटलेले सध्याचे वातावरण आहे. या सर्वाला भारतीय जनता पक्ष जबाबदार आहे. राज्याला यशवंतराव चव्हाण, बाळासाहेब ठाकरे यांनी एकसंध ठेवले. परंतु, गेल्या दहा वर्षांत या परिस्थितीत बदल झाला आहे. जाती-धर्मानुसार महाराष्ट्राचे तुकडे पडत आहेत, अशी खंतही त्यांनी व्यक्त केली.

देवेंद्र फडणवीस राज्य मंत्रिमंडळाच्या पहिल्या बैठकीत आम्ही धनगरांना आरक्षण देऊ असे सांगत होते. हेच फडणवीस महाविकास आघाडीचे अडीच वर्षे सरकार असताना आमची सत्ता आली तर मराठा समाजाला २४ तासांत आरक्षण देऊ, असे सांगत होते. मग फडणवीस आता आरक्षण का देत नाहीत?

- संजय राऊत, खासदार