अब सब को सभी से खतरा; फडणवीस-शिंदेंना टॅग करत राऊतांचं सूचक ट्वीट

शिवसेनेतलं बंड आता शिगेला पोहोचलं आहे. शिवसेना खासदार संजय राऊत यांनी आता एकनाथ शिंदे, देवेंद्र फडणवीसांना टॅग करत सूचक ट्वीट केलं आहे. ते सातत्याने ट्वीटच्या माध्यमातून किंवा सभेतून टीका करत असतात.

आपल्या ट्वीटमध्ये संजय राऊत म्हणतात की, अब नही कोई बात खतरे की, अब सभी को सभी से खतरा हैं - जौन एलिया. या ट्वीटमध्ये संजय राऊतांनी उद्धव ठाकरे, देवेंद्र फडणवीस, एकनाथ शिंदे आणि प्रियंका गांधींनाही टॅग केलं आहे.

शिवसेनेच्या ४० हून अधिक आमदारांनी एकनाथ शिंदेंसोबत (Eknath Shinde) बंडखोरी करुन भाजपाच्या मदतीने सरकार स्थापन केलं. त्यानंतर आता खासदारही शिंदे गटाकडे गेले आहेत. काल मातोश्रीवर उद्धव ठाकरेंच्या (Uddhav Thackeray) अध्यक्षतेखाली बैठक पार पडली. या बैठकीला काही खासदार गैरहजर होते.

दरम्यान, शिवसेनेला अजिबात धक्का लागलेला नाही, सत्ता असो वा नसो सेनेला अजिबात धक्का लागलेला नाही, असा विश्वासही संजय राऊतांनी व्यक्त केला होता. उद्धव ठाकरेंच्या नेतृत्वाखाली मातोश्रीवर सातत्याने शिवसेना नेत्यांच्या बैठका सुरू आहेत. कायदेशीर लढाई, पक्ष संघटन, पक्षबांधणी अशा अनेक विषयांवर या बैठकांमध्ये चर्चा होत आहेत.