राऊत नागपुरात आल्याने भाजपात धास्ती; पोलिस आयुक्तांची घेतली भेट

नागपूर : केंद्रापासून तर राज्यातील भाजपच्या नेत्यांना अंगावर घेणारे शिवसेनेचे प्रवक्ते खासदार संजय राऊत (Sanjay Raut) यांनी नागपूरमध्ये येऊन पोलिस आयुक्त अमितेश कुमार यांची भेट घेतली. त्यामुळे अनेकजण धास्तीत आहेत. ते कोणता बॉम्ब फोडतात याकडे सर्वांचे लक्ष लागले आहेत.

संजय राऊत रविवारी नागपूरले आले होते. शहरात आल्यानंतर त्यांनी पोलिस आयुक्त यांची भेट घेतली. या भेटीबाबत त्यांनी बोलण्याचे टाळले. फक्त सदिच्छा भेट होती असे त्यांनी सांगितले. मात्र, अलीकडेच राऊत यांनी महाआयटी घोटाळ्यात अमोल काळे आणि अजय ढवंगळे यांची नावे घेतली होती. अमोल काळे माजी मुख्यमंत्री देवेंद्र फडणवीस (devendra fadnavis) यांचे निकटवर्ती आहेत. ते लंडनला पळून गेले असावे अशी शंकाही व्यक्त केली होती. दुसऱ्याच दिवशी काळे यांनी राऊत (Sanjay Raut) यांच्या विरोधात अवामान याचिका दाखल करणार असल्याचे सांगून सर्व आरोप फेटाळून लावले होते.

संजय राऊत यांचे नातेवाईक तसेच कुटुंबीयांच्या विरोधात ईडीने चौकशी सुरू केली आहे. तेव्हापासून ते जास्तच आक्रमक झाले आहेत. महाराष्ट्रातील महाविकास आघाडीचे सरकार अस्थिर करण्यासाठी आपल्याला त्रास दिला जात असल्याचा खळबळजनक आरोपही त्यांनी केला होता. त्यानंतर ईडीच्या अधिकाऱ्यांचे घोटाळे बाहेर काढू असाही इशारा संजय राऊत (Sanjay Raut) यांनी दिला आहे.

ही नियमित आणि साधीसुधी बाब नाही

आरोप-प्रत्यारोप आणि कारवाया आता वैयक्तिक स्तरावर आल्याने राऊत यांनी नागपूरच्या पोलिस आयुक्तांची भेट घेऊन फडणवीस यांच्या निकटवर्तीयांची माहिती गोळा करीत असल्याचे बोलले जाते. फडणवीस यांच्या कार्यकाळात अमोल काळे यांना नागपूर (Nagpur) महापालिकेचे एलईडी पथदिवे लावण्याचे कंत्राट दिले होते. ते सध्या मुंबई क्रिकेट असोसिएशनचे अध्यक्ष आहेत. एकूणच संजय राऊत यांचे तडकाफडकी नागपुरात येणे आणि पोलिस आयुक्तांची भेट घेणे ही नियमित आणि साधीसुधी बाब नाही असे राजकीय वर्तुळात बोलले जात आहे.