शरद पवार पुढाकार घेत नाही, तोपर्यंत देशात पर्यायी सरकार अशक्य, शिवसेना नेत्याचं विधान

राष्ट्रवादीचे अध्यक्ष शरद पवार जोपर्यंत पुढाकार घेत नाही, तोपर्यंत देशातील सरकारला पर्याय मिळू शकत नाही, असं ठाम मत शिवसेना नेते संजय राऊत यांनी व्यक्त केलं आहे. राऊतांनी पुण्यातील एका कार्यक्रमात हजेरी लावली.

यामध्ये शरद पवार आणि संजय राऊत यांची एकाच व्यासपीठावर मुलाखत झाली. दोन्ही नेत्यांनी राजकीय फटकेबाजी केली. यावेळी व्यासपीठावर शरद पवारांसह गृहनिर्माण मंत्री जितेंद्र आव्हाड आणि काँग्रेस प्रवक्ते सचिन सावंत आणि अन्य नेते उपस्थित होते. (Sharad Pawar in Pune)

पुण्यातील कार्यक्रमात बोलताना, महाराष्ट्राने देशाचे नेतृत्व करावे, ही बाळासाहेब ठाकरे यांची भूमिका असल्याचं राऊत यांनी म्हटलं. सध्या देशात शरद पवार यांच्याकडे ती ताकद आहे. ते आणि आम्ही एकत्र आलो तर देशाला झूकवू, असं प्रतिपादन राऊतांनी केलं.

सत्तेतील आणि पूर्वीचे असे दोन्ही शरद पवार एकच आहेत. देशातील विरोधी पक्षांना एकत्र आणण्याची ताकद पवारांमध्ये आहे. पवार यांनी पुढाकार घेतल्याशिवाय देशातील सरकारला पर्याय मिळू शकत नसल्याचा दावा राऊतांनी केलाय.