'राजकीय गुन्हेगारांच्या कॉलरला...', संजय राऊतांचा भाजपला इशारा

मुंबई : शिवसेना गृहखात्यावर नाराज असल्याच्या चर्चा होत्या. त्यावर संजय राऊतांनी (Sanjay Raut on Shivsena NCP Dispute) प्रतिक्रिया दिली आहे. तिन्ही पक्षाचं सरकारचं उत्तमरित्या काम सुरू आहे. आम्ही सुडाच्या भावनेनं कारवाई करणार नाही. पण, कायद्याच्या मार्गानं राजकीय गुन्हेगारांच्या कॉलरला योग्य वेळी हात घालू, असा इशारा संजय राऊतांनी भाजपला (Sanjay Raut Warned BJP) दिला आहे.

केंद्रीय तपास यंत्रणासारख्या राजकीय सुडानं महाराष्ट्र सरकार कारवाई करणार नाही. आम्ही कायद्यानं कारवाई करू. आमचं कायद्याचं राज्य आहे. भाजपला जशाच तसे उत्तर देणं गरजेचं आहे. हे मुख्यमंत्री आणि गृहमंत्र्यांपासून सर्वांचं मत आहे. मुख्यमंत्र्यांकडे गृहखातं असावं त्यामुळे राज्याचा गाडा हाकणे सोयीस्कर होतं. पण, तिन पक्षांच्या सरकारमध्ये ते शक्य नाही. मुख्यमंत्री सर्व खात्यांचे प्रमुख आहेत. तसेच भाजपच्या नेत्यांवर मुख्यमंत्र्यांचं बारी लक्ष आहे. कायद्याच्या मार्गानं योग्य वेळी राजकीय गुन्हेगारांच्या कॉलरला हात घालणार, असा इशारा संजय राऊतांनी दिला आहे.

राष्ट्रवादीला मुख्यमंत्रिपद हवंय, असा गौप्यस्फोट सुधीर मुनगंटीवार यांनी केला होता. त्यावरून संजय राऊतांनी मुनगंटीवारांवर टीका केली आहे. सुधीर मुनगंटीवारांना मध्ये नाक खुपसायची काय गरज आहे. राष्ट्रवादीला मुख्यमंत्री हवंय, हे ठरविण्याचा अधिकार तुम्हाला कोणी दिलाय. हे तुमचं काम नाही. या फुसुकल्या सोडण्याचं काम भाजपकडून सुरू आहे. त्यामुळे वातावरण दुषित होईल, असं वाटत असेल. पण, असं होणार नाही. कारण तिन्ही पक्षांचा एकमेकांवर विश्वास आहे, असं राऊत म्हणाले.

आमच्या सरकारमध्ये अजिबात विसंवाद नाही. सर्व तिन्ही पक्षांमध्ये सुसंवाद आहे. आमच्यामध्ये प्रत्येक गोष्टीचं आदानप्रदान सुरू आहे. मुख्यमंत्रिपद कोणाला पाहिजे नसतं? भाजपला देखील मुख्यमंत्रिपद हवंय आहे. त्यामुळे त्यांनी सेनेसोबतची युती तोडली. महाविकास आघाडीने मुख्यमंत्रिपद पाच वर्ष शिवसेनेला दिलं आहे. हे भाजपने समजून घ्यायला पाहिजे. त्यांनी उगाच त्रास करून घेऊ नये. मानसिक त्रास जास्त झाला तर मानसिक, हृदयविकाराचा झटका येतो. अडीच वर्ष आम्हाला सुखानं जगू द्या, अशी टीका देखील राऊतांनी भाजपवर केली आहे.