हकालपट्टीनंतर बांगर भडकले; थेट उद्धव ठाकरेंना दिलं आव्हान

हिंगोली : शिवसेनेचे बंडखोर आमदार संतोष बांगर यांची शिवसेनेच्या हिंगोली जिल्हा प्रमुखपदावरुन शिवसेनेकडून हाकालपट्टी करण्यात आली आहे. यापार्श्वभूमीवर भडकलेल्या बांगर यांनी शक्तीप्रदर्शनाचा निर्णय घेतला असून थेट उद्धव ठाकरे यांना आव्हान दिलं आहे. (Santosh Bangar angry after eviction from ShivSena gives challenge to Uddhav Thackeray)

बांगर म्हणाले, मी बाळासाहेबांचा कडवट शिवसैनिक आहे. सरसेनापती बाळासाहेब ठाकरे हयात असताना माझी शिवसेना जिल्हा प्रमुखपदी नियुक्ती झाली होती. माझी कुठलीही चूक नाही पण मी सकाळपासून मीडियात बघतोय की, मला पदावरुन हटवण्यात आलं आहे. पण मी पदावरुन दूर झालेलो नाही. मी आजही शिवसेनाचा जिल्हा प्रमुख आहे आणि उद्याही राहिन.

उद्धव ठाकरेंची कोणीतरी दिशाभूल करत आहेत. मला त्यांना एवढचं सांगण आहे की त्यांनी दिशाभूल करणाऱ्यांना थोडसं बाजूला करावं आणि जो ओरिजिनल पडद्याकडं बघण्याचा दृष्टीकोन ठेवा. आपण खरंच चांगले नेते आहात. लहान तोंडी मोठा घास घेणं चुकीचं आहे. पण आपले ४० आमदार शिंदे गटाकडे शिवसेनेचा मुख्यमंत्री व्हावा यासाठी गेले आहेत.

जर ही बाब चूक असेल तर आम्ही शिवसैनिक ती चूक कधी करणार नाही. कारण शिवसेनेच्या मुख्यमंत्र्याला आम्ही मतदान केलं आहे, आम्ही कुठलाही गुन्हा केलेला नाही. आज तुम्हाला सांगतो आणखी १२ खासदार आणि ५०च्यावर जिल्हाप्रमुखांनी आम्ही शंभर टक्के तुमच्यासोबत आहोत, असं आम्हाला सांगितलंय. बाकीचे शिवसैनिकांना जी भाजप-शिवसेनेची नैसर्गिक युती होती तीच मान्य होती, असंही संतोष बांगर यांनी म्हटलं आहे.