अँटेलिया स्फोटकाचा मास्टर माईंड परमबीर सिंगच; सतेज पाटील

पणजी: सध्या पाच राज्यातील निवडणूका जवळ आल्या आहेत. उमेदवारांचे प्रचार सुरु आहेत. या प्रचारात आरोप- प्रत्यारोपाच्या फैऱ्या सुरु आहेत. गोव्यातील विधानसभा निवडणुक (Goa Assembly Elections) काँग्रेस उमेदवारांच्या प्रचारासाठी गेलेल्या सतेज पाटील (Satej Patil)यांनी परमबीर सिंग यांनी केलेल्या दाव्यावर मत व्यक्त केले. यात त्यांनी मनसुख हिरेन हत्या प्रकरण आणि अँटेलिया स्फोटके प्रकरणाचा मास्टर माईंड दुसरे तिसरे कोणी नसून, मुंबईचे माजी पोलिस आयुक्त परमबीर सिंगच आहेत. असे त्यांनी म्हटले आहे.

सचिन वाझेला (Sachin Waze) सेवेत घेण्यासाठी मुख्यमंत्री उद्धव ठाकरे, पर्यावरण मंत्री आदित्य ठाकरे (Aditya Thackeray)आणि माजी गृहमंत्री अनिल देशमुख (Anil Deshmukh) यांचा माझ्यावर दबाव होता. त्यामुळेच मी वाझेला सेवेत घेतले, असा दावा परमबीर सिंग यांनी ईडीसमोर केला आहे. महाराष्ट्रात वेगळे वातावरण तयार करण्याचा प्रयत्न केंद्र सरकार करत आहे. अशी टीका ही सतेज पाटील यांनी केली.

सतेज पाटील म्हणाले, ईडीने आता खुलासा केला पाहिजे. हे सर्व पूर्वनियोजितपणे केले जात आहे. बातम्या पद्धतशीरपणे पेरल्या जात आहेत. या बातम्या खर्‍या आहेत की खोट्या आहेत हे ईडीने सांगावे असे मत पणजीत पाटील यांनी व्यक्त केले. ज्यावेळी सत्य बाहेर येईल, तेव्हा परमबीरसिंग यांना सर्व आरोप खोटे असल्याचे समजेल. कोणत्याही पोलिस अधिकार्‍यांच्या नियुक्त्या या ठरलेल्या प्रक्रियेनुसारच केल्या जातात. वरिष्ठ अधिकार्‍यांच्या बैठकीत मान्यता मिळाल्यानंतरच पोलीस अधिकार्‍याच्या बदल्या होत असतात. असे ही ते म्हणाले.