कोल्हापूर उत्तरमध्ये पराभूत झाल्यानंतर सत्यजीत कदम यांची प्रतिक्रिया

कोल्हापूर: कोल्हापूर उत्तर मतदारसंघासाठी (Kolhapur North Bypoll election) झालेल्या पोटनिवडणुकीत महाविकास आघाडी आणि काँग्रेसच्या उमेदवार जयश्री जाधव यांनी विजय मिळवला. भाजपचे उमेदवार सत्यजीत कदम पराभूत झाले आहेत. या विजयामुळे कोल्हापूर उत्तर मतदारसंघाच्या पहिल्या महिला आमदाराचा मान जयश्री जाधव यांना मिळाला आहे. कोल्हापूरच्या जनतेने स्वाभिमान राखला असल्याची प्रतिक्रिया जयश्री जाधव यांनी विजयानंतर दिली. आघाडीचा विजय होताच सतेज पाटील (Satej Patil) यांनी प्रतिक्रिया दिली. तर पराभूत झाल्यानंतर चंद्रकांत पाटील (Chandrakant Patil) यांनीही प्रतिक्रिया दिली आहे. दरम्यान भाजपचे उमेदवार सत्यजीत कदम (Satyajeet Kadam) यांनीही आम्ही आता २०२४ ची तयारी करू तेव्हा बघू अशी प्रतिक्रिया दिली आहे.

सत्यजित कदम म्हणाले, कोल्हापूर शहरातून मतदार यादीतून नावं गायब झाली आहेत, याचा शोध घेऊन यावर अभ्यास करणार आहोत. प्रत्येक बूथवरून आम्हाला माहिती येत आहे. लवकरच याची माहिती मिळेल. या निवडणूकीत भाजपची ताकद वाढलेली दिसून आल्याचेही ते म्हणाले. आता जरी पराभव झाला असला तरी २०२४ च्या तयारीला लागणार आहे तेव्हा बघू असा सूचक इशाराही त्यांनी दिला.

कोल्हापूर उत्तर मधून भाजपाचा पराभव झाल्यानंतर चंद्रकांत पाटील यांच्या मीम्स व्हायरल झाल्या आहेत. तर चंद्रकांतदादा पराभव पत्करून हिमालयात पोहचल्याचा फोटो सध्या सोशल मीडियावर व्हायरल झाला आहे. तर दुसरीकडे पालकमंत्री सतेज पाटील, ग्रामविकास मंत्री हसन मुश्रीफ आणि माजी आमदार राजेश क्षीरसागर (Rajesh Kshirsagar) यांच्यासह कार्यकर्त्यांनी ये दोसती हम नही तोडगे या गाण्यावर गुनगुनताना दिसत आहेत. कोल्हापुरात गुलालाच्या उधळीत महाविकास आघाडीचे कार्यकर्ते जल्लोष करत आहेत.