Aditya Thackeray Birthday : 'तू मूर्तिमंत उदाहरण...' सत्यजीत तांबे यांच्या आदित्य ठाकरेंना अनोख्या शुभेच्छा!

Aditya Thackeray Birthday : दोघेही तरुण, दोघांनाही राजकीय वारसा लाभलेला... पण संघर्ष दोघांनाही चुकला नाही! आ. सत्यजीत तांबे आणि आ. आदित्य ठाकरे या दोन युवा नेत्यांमधील हे साम्य! आ. तांबे वयाने आणि अनुभवानेही आदित्य यांच्यासाठी थोरलेच. या थोरलेपणाच्या नात्यानेच सत्यजीत यांनी आदित्य ठाकरेंना वाढदिवसाच्या शुभेच्छा दिल्या.

सर्वच राजकीय पक्षांमधील नेत्यांसोबत आ. सत्यजीत तांबे यांचे संबंध मैत्रीचेच आहेत. त्यात युवा नेत्यांसोबत त्यांचे विचार आणखीनच चांगले जुळतात. समोरच्या व्यक्तीचे गुण आणि चांगल्या गोष्टी हेरण्याचा आ. तांबे यांचा स्वभाव आदित्य ठाकरे यांना त्यांनी दिलेल्या शुभेच्छांमधून अगदीच स्पष्ट दिसतो.

Instagram वर पोस्ट करत शुभेच्छा देताना आ. तांबे यांनी आदित्य यांचा उल्लेख 'प्रिय आदित्य' असा केला. 'जेव्हा परिस्थिती आव्हानात्मक होते, तेव्हा आव्हानं पेलणाऱ्यांचं काम सुरू होतं,' या उक्तीचं मूर्तिमंत उदाहरण तू आहेस, अशी दिलखुलास तारीफ करत सत्यजीत यांनी आपल्या सदिच्छा आदित्य यांना दिल्या.

सध्याच्या गढुळलेल्या राजकीय वातावरणात एका उमद्या मनाच्या युवा नेत्याने दुसऱ्या पक्षाच्या युवा नेत्याच्या कामाची तारीफ करत त्याला शुभेच्छा दिल्या, या बाबीचं कौतुक राजकीय वर्तुळातच नाही, तर सोशल मीडियावरही होत आहे.