शाळा, महाविद्यालये सोमवारपासून सुरू? मुख्यमंत्र्यांचा लवकरच निर्णय

कोरोनाची तिसरी लाट धुमाकूळ घालत असताना राज्य सरकारने शाळा आणि महाविद्यालयं बंद करण्याचा निर्णय घेतला. येत्या १५ फेब्रुवारीपर्यंत राज्यातील सर्व वर्ग ऑनलाईन पद्धतीने भरणार आहेत. दरम्यान, राज्यातील शाळा महाविद्यालये लवकरात लवकर सुरू करण्यासाठी शिक्षण विभागाकडे विचाराधीन असलेल्या प्रस्तावावर निर्णय येणार आहे. (Schools Reopen in Maharashtra)

आता कोरोनाची लाट ओसरत असल्याची आकडेवारी मागील 4 दिवसांपासून समोर येत असल्याने पुन्हा शाळा सुरू करण्याची मागणी जोर धरत आहे. शालेय शिक्षण राज्यमंत्री बच्चू कडू (Bachchu Kadu) यांनी यासंदर्भात माहिती दिली आहे. याआधी शाळा टप्प्या-टप्प्याने सुरू व्हाव्या असं मत खासदार सुप्रिया सुळे यांनी व्यक्त केलं होतं.

मागील 20 दिवसांपासून बंद असलेले वर्ग पुन्हा भरवण्याला आता हिरवा कंदील मिळणार आहे. त्यामुळे 15 फेब्रुवारीआधी ऑफलाईन वर्ग सुरू होण्याची शक्यता वाढली आहे, राज्याच्या शिक्षण विभागाने मांडलेल्या प्रस्तावावर मुख्यमंत्री उद्धव ठाकरे यांनी अनुकूलता दर्शवल्याची माहिती समोर येत आहे. येणाऱ्या काळात सुधारणाऱ्या परिस्थितीनुसार माध्यमिक शाळा आणि कॉलेज सुरू करणार असल्याची महिती सूत्रांनी दिली आहे.

शालेय शिक्षण राज्यमंत्री बच्चू कडू यांनी राज्याच्या मुख्य सचिवांना यासंदर्भात पत्र लिहले आहे. स्थानिक परिस्थिती हाताळून आणि जिल्हा प्रशासनाच्या मदतीने यावर नियंत्रण ठेवण्यात यावं, असं त्यांनी सुचवलं आहे. यावर मंत्री वर्षा गायकवाड यांनीही अनुकूलता दर्शवली असून यासंदर्भात मुख्यमंत्र्यांना माहिती देण्यात आल्याचं समोर येतंय.