Sharad Pawar: शरद पवारांनी कोल्हापूरात टाकला मोठा राजकीय डाव? अजित पवारांच्या राष्ट्रवादीचा मोठा नेता भेटीला

माजी केंद्रीय कृषी मंत्री शरद पवार सध्या कोल्हापूर दौऱ्यावर आहेत. यावेळी त्यांच्या विविध कार्यक्रमांबरोबर अर्थसंकल्पावरही प्रतिक्रिया देत हा अर्थसंकल्प विधानसभा निवडणुका डोळ्यासमोर ठेऊन माडला असल्याचे म्हटले आहे.

या सर्व घडामोडींमध्ये पवार यांनी कोल्हापूरात मोठा राजकीय डाव टाकल्याची चर्चा राजकीय वर्तुळात सुरू आहे. कारण अजित पवार यांच्या राष्ट्रवादीचे प्रदेश उपाध्यक्ष ए.वाय पाटील यांनी पवार यांची भेट घेतली आहे. त्यामुळे विधानसभा निवडणुकीच्या तोंडावर शरद पवार अजित पवार यांना धक्का देणार का? असा प्रश्न राज्यातील नागरिकांना पडला आहे.

कोण आहेत ए.वाय पाटील?

ए.वा पाटील हे अजित पवार यांच्या राष्ट्रवादीचे प्रदेश उपाध्यक्ष आहेत. त्यांनी नुकत्याच झालेल्या लोकसभा निवडणुकीत काँग्रेस उमेदवार शाहू महाराज यांना पाठिंबा दिला होता. त्यामुळे येत्या काही काळात ते अजित पवार यांची साथ सोडणार हे निश्चित होते.

दरम्यान ए.वाय पाटील हे विधानसभा निवडणुकीसाठी काँग्रेसकडून उमेदवारीसाठी उत्सुक होते. पण त्यांची काँग्रेसशी जवळीक वाढल्यानंतर काँग्रेसच्या काही कार्यकर्त्यांनी नाराजी व्यक्त केली होती. त्यामुळे जर काँग्रेसशी नाही जमले तर ए.वाय पाटील शरद पवारांच्या राष्ट्रवादीत जाऊ शकतात.

दरम्यान राज्यात येत्या तीन महिन्यांत विधानसभेची निवडणूक लागणार आहे. त्यामुळे सर्वच आजी-माजी आमदार आणि इच्छुकांनी आपल्यालाच उमेदवारी मिळावी यासाठी आतापासूनच तयारी सुरू केली आहे.

गेल्या जुलैमध्ये राष्ट्रवादी फुटल्यानंतर ए.वाय पाटील अजित पवार यांच्यासोबत गेले होते. त्यानंतर त्यांना राष्ट्रवादीचे प्रदेश उपाध्यक्षपदही मिळाले होते. पण आता ते पुन्हा शरद पवार यांच्या राष्ट्रवादीच्या वाटेवर आहेत. त्यामुळे आता शरद पवार त्यांना पुन्हा पक्षात घेणार का हे पाहणे औत्सुक्याचे ठरणार आहे.